Հայաստանից Թուրքիա փոխանցումները 8 անգամ պակասել են. որ երկրից որքան գումար է եկել ՀՀ

ՀՀ Կենտրոնական բանկի տվյալներով, 2021թ-ի հունվար-նոյեմբեր ամիսներին ֆիզիկական անձանց բանկային փոխանցումների միջոցով արտերկրից Հայաստան է փոխանցվել 1մլրդ 898 մլն ԱՄՆ դոլար, իսկ Հայաստանից արտերկիր՝ գրեթե կիսով չափ պակաս՝ 1մլրդ 92 մլն դոլար: Այսինքն՝ դրամական ներհոսքի ու արտահոսքի տարբերությունը, կամ զուտ ներհոսքը կազմել է 806 մլն դոլար:

Հայաստանյան բանկերի տվյալներով, տրանսֆետների ծավալով առաջին տասնյակում են ՌԴ-ն, ԱՄՆ-ն, Ուկրաինան, Ղազախստանը, Գերմանիան, Ֆրանսիան, Իսպանիան, ԱՄԷ-ն, Չինաստանն ու Թուրքիան:

Հայաստան ֆինանսական ներհոսքի ծավալով առաջատարն ավանդաբար մնում է Ռուսաստանը, որտեղից անցյալ տարվա 11 ամիսներին Հայաստան է փոխանցվել 781 մլն ԱՄՆ դոլար, երկրորդ տեղում ԱՄՆ-ն է (517 մլն դոլար), երրորդը՝ Ղազախստանը (82 մլն դոլար)։

Այս երկրից Հայաստան փոխանցումների ծավալը հատկապես ավելացել է վերջին 3-4 տարիների ընթացքում, երբ Հայաստանից ղազախները մեծ թվով օգտագործված ավտոմեքենաներ էին գնում՝ օգտվելով էժան մաքսատուրքից: Բայց, պարզվում է, որ մաքսային արտոնության ժամկետի ավարտից հետո էլ ֆինանսական շարժը Հայաստանի ու Ղազախստանի միջև շատ չի նվազել:

Համեմատության համար նշենք, որ հակառակ ուղղությամբ՝ Հայաստանից Ղազախստան անցյալ տարվա 11 ամիսների ընթացքում 5.3 մլն դոլար է փոխանցվել, 2020-ին՝ 5, 2019-ին՝ 6 մլն դոլար:

Հետաքրքրական պատկեր է ներկայացնում նաև Թուրքիայի հետ փոխանցումների՝ վերջին 10 տարվա դինամիկան: Ըստ բանկերից տրամադրված տվյալների՝ 2010թ-ի համեմատ Հայաստանից Թուրքիա փոխանցվող գումարներն ավելի քան 8 անգամ կրճատվել են. եթե 2010-ին ՀՀ-ից Թուրքիա 41 մլն ԱՄՆ դոլար է փոխանցվել, ապա 2021-ին՝ 5.6 մլն:

Իսկ Թուրքիայից Հայաստան փոխանցումները կտրուկ փոփոխության չեն ենթարկվել՝ մնալով տարեկան 1-3 մլն դոլարի շրջանակում: Ամենամեծ ծավալը գրանցվել է 2011թ-ին՝ կազմելով 6 մլն, 2020-ին փոխանցվել է՝ 3, 2021-ի հունվար-նոյեմբերին՝ 1.4 մլն դոլար: