Մեկնարկել է Արցախի Մարտունու շրջանի հարակից գյուղերի և Ճարտար գյուղի բնակիչների համար ջրամատակարարման կենտրոնական համակարգի կառուցումը։ Աշխատանքներն իրականացվում են ՌԴ խաղաղապահ զորախմբի զինծառայողների աջակցմամբ, հայտնում է ՌԴ ՊՆ մամուլի ծառայությունը։
«Քանի որ տվյալ տարածքը գտնվում է կողմերի սահմանազատման գծի մոտ, վարչակազմը դիմել է ռուսական խաղաղապահ զորախմբի հրամանատարությանը` խնդրելով ապահովել աշխատանքների անվտանգությունը։ Այս փուլում բանվորները ջրի ստացման համար հորատանցքեր են փորում։ Բոլոր աշխատանքները նախատեսվում է ավարտել մեկ շաբաթվա ընթացքում», – հայտնել է ՌԴ խաղաղապահ զորախմբի ներկայացուցիչ Սերգեյ Գապեևը։
Մասնագետ Արարատ Գևորգյանն իր հերթին նշել է, որ նոր խողովակ անցկացնելու անհրաժեշտություն է առաջացել, քանի որ բնակավայրերում ջրի պակաս կա։ Նա երախտագիտություն է հայտնել խաղաղապահներին աշխատողների անվտանգությունն ապահովելու համար։
Բոլոր աշխատանքները` ջրատար համակարգերի և ջրամատակարարման արտաքին ցանցերի մոնտաժումը նախատեսվում է ավարտին հասցնել մինչև ամսվա վերջ։
2022 թվականի սկզբին ռուս խաղաղապահները ԼՂ–ում ապահովել են ավելի քան 30 միջոցառումների անվտանգությունը։
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին: