ԵՐԵՎԱՆ, 24 հունվարի– Sputnik. Սահմանազատման գործընթաց սկսելու առաջարկները, որոնք հայկական կողմը ներկայացրել է ՌԴ–ին ու Ադրբեջանին, վերաբերում են ոչ թե բուն սահմանազատմանը, այլ մինչ գործընթացի մեկնարկը անվտանգության միջոցառումներին։
Այս մասին ՀՀ վարչապետ Նիկոլ Փաշինյանը հայտնեց այսօր առցանց մամուլի ասուլիսի ժամանակ` պատասխանելով Sputnik Արմենիայի` հայկական կողմի առաջարկների մասին հարցին։
«Առաջարկները հետևյալի մասին են. դուք գիտեք, որ Սոչիում ստորագրված եռակողմ հայտարարության մեջ արձանագրված է, որ կողմերը պայմանավորվել են քայլեր ձեռնարկել հայ-ադրբեջանական սահմանին անվտանգության ու կայունության մակարդակը բարձրացնելու վերաբերյալ և գործը տանել դեպի դեմարկացիա և դելիմիտացիա` երկկողմ հանձնաժողովի ձևավորմամբ։ Մեր առաջարկը վերաբերում է հենց անվտանգության միջոցառումներին, ինչի մեջ գլոբալ առումով ոչ մի գաղտնիք չկա»,– ասաց Փաշինյանը` հավելելով, որ դեռևս 2021թ–ի մայիսին ինքը հրապարակավ ներկայացրել էր սահմանից ԶՈւ հայելային հետքաշման առաջարկը։
Ինչ վերաբերում է հանձնաժողովի ձևավորման ժամկետներին, ՀՀ վարչապետը նշեց`որքան շուտ, այնքան լավ։
Ըստ Փաշինյանի` Բաքուն, ըստ էության, ևս կողմ է արտահայտվել առանց նախապայմանների սահմանազատման գործընթաց սկսելուն։ Այս մասին, նրա խոսքով, վկայում է Վիեննայում Ադրբեջանի արտգործնախարար Ջեյհուն Բայրամովի արած հայտարարությունը։
«Ադրբեջանն աջակցում է Հայաստանի հետ սահմանների սահմանազատման գործընթացի մեկնարկին առանց որևէ նախապայմանի», - ասել էր Բայրամովը ԵԱՀԿ գլխավոր քարտուղար Հելգա Շմիդտի հետ հանդիպմանը:
Հիշեցնենք` հունվարի 19–ին, ՀՀ Ազգային ժողովում ՀՀ արտգործնախարար Արարատ Միրզոյանը նշել էր, որ Հայաստանի ու Ադրբեջանի միջև սահմանագծման և սահմանազատման հանձնաժողով դեռևս չի ստեղծվել, ժամկետներ էլ հստակ չկան։
Միրզոյանի խոսքով` ներկայում քննարկվում են այն պայմանները, որով այդ հանձնաժողովը կարող է սկսել աշխատել։
Հանձնաժողովի ստեղծման ժամկետների հարցում, ըստ Միրզոյանի, հստակություն չկա, սակայն խոսքը մոտալուտ գործընթացի մասին է։
Հավելենք, որ 2021 թվականի մայիսի 12-ից ադրբեջանական զինուժը ներխուժել է Հայաստանի ինքնիշխան տարածք։ Նրանք գտնվում են Սյունիքի Սև լճի շրջանում՝ փորձելով ամրապնդվել այնտեղ, ինչպես նաև Գեղարքունիքի մարզում։
Մայիսի վերջին Փաշինյանն ադրբեջանական կողմին առաջարկել էր զորքերը հայելային եղանակով հետ քաշել և այդ հատվածում միջազգային դիտորդներ տեղակայել սահմանների հետագա հստակեցման նպատակով: