ԵՐԵՎԱՆ, 24 հունվարի – Sputnik. Սեմյոնովկան իր պահանջից չի հրաժարվում ու հիմա սպասում է կառավարության պատասխանին։ Sputnik Արմենիայի հետ զրույցում գյուղապետի ժամանակավոր պաշտոնակատար Դավիթ Մնացականյանը հայտնեց, որ այսօր առավոտից մեկնարկած բողոքի ակցիան այս պահին ավարտվել է, Սևանի ավտոճանապարհը փակած գյուղացիներն իրենց պահանջները ներկայացրել են ու գնացել տուն։
«Հիմա սպասում են, տեսնեն, թե կառավարությունը ինչ կանի»,– ասաց Մնացականյանը։
Հիշեցնենք` այսօր` հունվարի 24-ի առավոտից, լարված իրավիճակ էր ստեղծվել Գեղարքունիքի մարզում: Սեմյոնովկա ու Ծովագյուղ գյուղերի բնակիչներն ի նշան բողոքի փակել էինԵրևան-Սևան-Իջևան ավտոճանապարհը` ՀՀ կառավարությունից պահանջելով չեղարկել համայնքի խոշորացման մասին որոշումը:
Ի դեպ, Դավիթ Մնացականյանը մեզ հետ զրույցում հայտնեց, որ հարևան գյուղերն իրար դեմ ոչինչ չունեն ու անգամ իրար միանալու գաղափարին դեմ չեն, բայց դեմ են Սևան քաղաքի հետ մեկ միասնական համայնք դառնալուն։
«Գյուղացիները Սևան քաղաքի դեմ ոչինչ չունեն, բայց չեն ուզում Սևանի հետ մի ընդհանուր համայնք դառնալ։ Գյուղացիներն ուզում են, որ երկու գյուղերը` Սեմյոնովկան ու Ծովագյուղը, իրար հետ միանան, վարչական մի համայնք դառնան։ Էլի խոշորանանք, բայց մի տարի հետո արդյունքը տեսնեն, նոր հետո իրենց որոշումը կայացնեն։ Թող տեսնեն, որ երկու համայնք միացել են, ինչ ձևով են զարգանում գյուղերը»,– ասաց Մնացականյանը։
Նա նաև հայտնեց, որ այսօրվա բողոքի ակցիային մարզային ղեկավարությունից որևէ մեկը ներկա չի եղել, գյուղացիների հետ չի հանդիպել։ Բայց իրենք վստահ են, որ իրենց պահանջի մասին մարզպետարանում ու կառավարությունում տեղյակ են։ Ծովագյուղն ու Սեմյոնովկան վճռական են` շարունակելու իրենց պայքարը։
Հիշեցնենք` դեկտեմբերի 6-ին գյուղի 195 ընտրողները մեկ մարդու պես չէին մասնակցել ՏԻՄ ընտրություններին` այդկերպ իրենց բողոքը հայտնելով համայնքի խոշորացման դեմ։ Ընտրությունների պատմության մեջ նման դեպք դեռ չէր գրանցվել։