ԵՐԵՎԱՆ, 24 հունվարի – Sputnik. Ռուս–ուկրաինական լարվածությունն օր օրի ավելանում է, իրավիճակը պայթյունավտանգ է, ու բնականաբար, այն չի կարող չհուզել Հայաստանին։
Այսօր առցանց մամուլի ասուլիսի ժամանակ ասաց ՀՀ վարչապետ Նիկոլ Փաշինյանը` պատասխանելով ռուս–ուկրաինական հարաբերութունների ու կոնֆլիկտին ՀԱՊԿ հնարավոր մասնակցության մասին հարցին։
«Բնականաբար, մենք շահագրգռված ենք, որպեսզի իրավիճակը վերահսկողությունից դուրս չգա Ուկրաինայում։ Մենք, հասկանալի է` շատ մեծ լծակներ չունենք այդ առումով, բայց, բնականաբար, ցանկացած իրավիճակում առաջնորդվում ենք Հայաստանի ազգային շահերին համապատասխան»,– ասաց Փաշինյանը։
Ինչ վերաբերում է ՀԱՊԿ–ի ներգրավմանն ու այդ դեպքում ՀՀ–ի դիրքորոշմանը` որպես ՀԱՊԿ նախագահող երկիր, ՀՀ վարչապետը նշեց, որ չի ցանկանում հարցին պատասխանել «եթե»–ներով։
«Ես հույս ունեմ, որ այդ «եթե»–ներին բանը չի հասնի, և իրավիճակը չի սրվի մինչև ռազմական բախում»,– ասաց նա։
Ի դեպ, Նիկոլ Փաշինյանն արձանագրեց, որ 2013-14թթ–ից աշխարհում աշխարհաքաղաքական տեկտոնիկ գործընթացներ են սկսվել, որոնք մինչ օրս շարունակվում են ու այդ գործընթացներն են ազդել նաև տարածաշրջանում ու ԼՂ–ում առկա իրադրության վրա։
Հիշեցնենք` 2021 թվականի դեկտեմբերին Մոսկվան ԱՄՆ–ի հետ անվտանգության երաշխիքների վերաբերյալ պայմանագրի և Ռուսաստանի ու ՆԱՏՕ–ի անդամ երկրների անվտանգությունն ապահովելու միջոցների վերաբերյալ համաձայնագրերի նախագծեր է հրապարակել։ Մասնավորապես, Մոսկվան պահանջում է, որ դաշինքի ուժերը դադարեն հետխորհրդային երկրներում ռազմաբազաների կառուցումը, չմիացնեն Ուկրաինան և հրաժարվեն դեպի արևելք հետագա ընդլայնումից։
Հունվարին կողմերը մի քանի անգամ խորհրդակցություններ են անցկացրել, սակայն բանակցությունները դեռ կոնկրետ լուծումների չեն հանգեցրել։
Մոսկվան մտահոգություն է հայտնում, որ ՆԱՏՕ-ն և ԱՄՆ-ն Ուկրաինան ռազմական պլացդարմ են դարձնում Ռուսաստանի դեմ։ ՌԴ ԱԳՆ-ի հայտարարության համաձայն` հարևան երկրին ներքաշում են դաշինքի մեջ, նրան սպառազինություն են մատակարարում։
Ռուսաստանը բազմիցս հերքել է Ուկրաինայի նկատմամբ «ագրեսիվ գործողությունների» վերաբերյալ Արևմուտքի մեղադրանքները։ ՌԴ իշխանությունները նշում են, որ երկիրը որևէ մեկին չի սպառնում և որևէ մեկի վրա հարձակվելու մտադրություն չունի։