Ռուսաստանի և Ուկրաինայի միջև հանդես գալով միջնորդական հանձնառությամբ` Թուրքիան նոր խաղ է նախաձեռնել և դրան միացրել Ադրբեջանի նախագահ Իլհամ Ալիևին, որովհետև վերջինիս հանդիպումը Վլադիմիր Զելենսկիի հետ կապված էր հենց թուրքական առաջարկի հետ։ Sputnik Արմենիայի հետ զրույցում ասաց թուրքագետ Ռուբեն Սաֆրաստյանը` նշելով, որ պատահական չէր այդ հանդիպումից հետո Ալիևի և ՌԴ նախագահ Վլադիմիր Պուտինի հեռախոսազրույցը։
«Առաջին անգամ չէ, որ Թուրքիան հանդես է գալիս նման նախաձեռնությամբ։ Որոշ ժամանակ առաջ Էրդողանը նույնպես հանդես էր եկել նման առաջարկով, որը մերժվել էր ռուսական կողմից։ Վերջին հանձնառության վերաբերյալ ՌԴ–ի պատասխանը նույնպես կարելի է ընկալել որպես մերժում, որովհետև այնտեղ կա հետևյալ ձևակերպումը` եթե թուրք գործընկերները կարող են ազդել ուկրաինացիների վրա և դրդել նրանց կատարել նախկինում ձեռք բերված մինսկյան պայմանավորվածությունները, ապա դա կարելի է միայն ողջունել, և այդ դեպքում կարևոր չէ, թե կողմերը որտեղ կհանդիպեն»,– նշեց նա։
Սաֆրաստյանի կարծիքով` բացի նրանից, որ Թուրքիան Ուկրաինայի հետ ունի հեռուն գնացող ռազմատեխնիկական համագործակցություն, ինչի արդյունքն արդեն իսկ տեսանելի է, Թուրքիան նաև մեղադրում է ՌԴ–ին` համարելով, որ վերջինս օկուպացրել է Ղրիմը։ Թուրքիան նաև Արևմուտքի մաս է կազմում` ի դեմս ՆԱՏՕ–ի, հետևաբար նրա միջնորդական հանձնառությունը դառնում է անիմաստ։
«Էրդողանի խաղը մի կողմից նպատակ ունի ցույց տալու, որ Թուրքիան որոշակի դերակատարում ունի նույնիսկ եվրոպական գործերում, մյուս կողմից ցանկանում է ՌԴ–ի մոտ տպավորություն ստեղծել, թե կարող է գործել Արևմուտքից անկախ, ինչն իհարկե իրականությանը չի համապատասխանում, և դա ռուսական կողմը շատ լավ գիտակցում է։ Ընդ որում` Էրդողանը խաղ է խաղում տարբեր տարածքաշրջաններում տարբեր հակամարտությունների առթիվ»,– նշեց ակադեմիկոսը։
Սաֆրաստյանին անհանգստացնում է նաև այն հանգամանքը, որ Ալիևը Պուտինի հետ հեռախոսազրույցի ընթացքում ուկրաինական խնդրից զատ քննարկել է արցախյան հիմնահարցը։
Ըստ այդմ` ակադեմիկոսը հետևյալ հարցադրումն է առաջ քաշում `արդյոք Էրդողանի նախաձեռնած խաղը որոշ չափով չի՞ անդրադառնա ղարաբաղյան խնդրի կարգավորման գործընթացի վրա, և այդ տեսանկյունից հետաքրքիր է, թե ինչ համատեքստում է Ալիևը Պուտինի հետ հեռախոսազրույցում անդրադարձել արցախյան հարցին։
Հիշեցնենք` Թուրքիայի նախագահ Ռեջեփ Թայիփ Էրդողանը Ռուսաստանի Դաշնության նախագահ Վլադիմիր Պուտինին և Ուկրաինայի նախագահ Վլադիմիր Զելենսկիին հրավիրել է Թուրքիա՝ երկու երկրների միջև առկա տարաձայնությունները հարթելու: Բացի այդ, Քալընն ասել է, որ Էրդողանը առաջիկա մի քանի շաբաթների ընթացքում կմեկնի Ուկրաինա` Զելենսկիի հետ բանակցելու։