ԵՐԵՎԱՆ, 20 հունվարի, Sputnik. Ֆինանսների նախարարությունը սկսել է մշտադիտարկումներ իրականացնել գովազդային դաշտում և պարզել է՝ 2020 թվականին համացանցով կատարված խաղադրուքների ծավալը, համեմատած 2018 թվականի հետ, ավելացել է 6 անգամ, իսկ մասնակիցների թիվը՝ 3։
Ազգային ժողովի հերթական նիստի ժամանակ այս մասին ասաց ՀՀ ֆինանսների նախարարի տեղակալ Արմեն Հայրապետյանը, ներկայացնելով «Գովազդի մասին» օրենքում փոփոխություններ լրացումներ կատարելու մասին նախագիծը։
«Համադրելով այդ ոլորտի միջազգային միտումները՝ հասկացել ենք, որ մեզ մոտ մի քանի անգամ այն զարգանում է, նաև ռիսկեր կան, որ խաղամոլությունը զարգանում է։ Մեզ մոտ 6 անգամ աճել է ցուցանիշը։ Առաջարկում ենք ինտերնետ շահումով խաղերի մասին գովազդը սահմանափակել, թողնելով միայն 4 և բարձր աստղանի հյուրանոցներում, սահմանային անցակետերում և այն վայրերում, որտեղ գործունեություն են իրականացնում՝ արտաքին մասում և ներսում»,- նշեց Հայրապետյանը։
Նա ընդգծեց, որ այդ ամենի շնորհիվ հնարավոր կլինի իրավիճակը մեղմել։ Փոխնախարարի խոսքով՝ խաղադրույքների ծավալը կազմում է ՀՀ պետական բյուջեի ծախսերի չափը, ՀՆԱ-ի 25-30 տոկոսը։
Նախագծի ընդունման արդյունքում ակնկալվում է խաղային բնագավառում ապահովել միասնական քաղաքականություն և հավասար մրցակցային պայմանների, պահանջների սահմանում: Ինտերնետ շահումով խաղերի, ինչպես նաև վիճակախաղերի՝ տոտալիզատորների կազմակերման գործունեության գովազդի կարգավորումները կհապատասխանեցվեն խաղատների և շահումով խաղերի կազմակերպման գովազդներին ներկայացվող սահմանափակումներին։
Նախագիծը դժգոհություն է առաջացրել գովազդային մեդիա ոլորտում՝ գովազդային ընկերությունների հասույթի մեծ մասը (60-70 տոկոս), իրենց պնդմամբ, գոյանում է ինտերնետ շահումով խաղերի և վիճակախաղերի ոլորտի շնորհիվ, սակայն ֆինանսների փոխնախարարի հաշվարկներով՝ այն կազմում է ընդամենը 20-25 տոկոս: