ԵՐԵՎԱՆ, 18 հունվարի - Sputnik. Պարտադիր բժշկական ապահովագրության համակարգը նախատեսում է ծածկել ամբուլատոր և կլինիկական ծառայությունների ծախսերի 99%-ը, ինչպես նաև քրոնիկ հիվանդություններ ունեցող անձանց որոշակի դեղամիջոցներ տրամադրել։ Տեղեկությունն ասուլիսի ժամանակ հայտնեց ՀՀ առողջապահության փոխնախարար Լենա Նանուշյանը։
Նախնական տվյալներով ՝ պարտադիր բժշկական ապահովագրության համակարգը կգործարկվի 2023 թվականին։ Համապատասխան նախագիծը ՀՀ առողջապահության նախարարությունը քննարկման է ներկայացրել ֆինանսների ու էկոնոմիկայի նախարարություններին և սոցաշխատողներին։ Հաջորդ փուլում նախագիծը կքննարկվի կառավարությունում, հաստատվելուց հետո օրինագծի տեսքով կներկայացվի ՀՀ Ազգային ժողով։ Դա է պատճառը, որ պարտադիր բժշկական ապահովագրության ներդրումը կարող է ձգձգվել։
Փորձը ցույց է տալիս, որ ՀՀ քաղաքացիների մեծ մասը չի դիմում բժշկական օգնության, քանի որ ի վիճակի չէ հոգալ բոլոր ծախսերը ։
«Ապահովագրությունը ծածկելու է բժշկական ծառայությունների ծախսերի 99 տոկոսը, այդ թվում ՝ վիրահատություններ, ատամնաբուժական միջամտություններ», - ասել է Նանուշյանը։
Ապահովագրությունը չի ծածկելու, օրինակ, պլաստիկ վիրահատությունների ծախսերը, եթե չկա բժշկական ցուցում, կամ ատամների իմպլանտացիան։ Ներկայիս փաթեթը ներառում է սրտի վիրահատություններ և քիմիաթերապիա, իսկ օրգանների փոխպատվաստման դեպքում պետությունը կարող է ծածկել ընդհանուր ծախսերի միայն 30%-ը։
Պարտադիր ապահովագրության ներդրումը նախատեսում է ամսական վճար ինչպես աշխատողի, այնպես էլ գործատուի կողմից աշխատավարձի մոտ 3 տոկոսի չափով: Նշված շեմը քննարկումների ընթացքում կարող է փոփոխվել։
Բացի այդ, փաթեթը նախատեսում է որոշակի դեղորայքի տրամադրում քրոնիկ հիվանդություններ ունեցող անձանց։
Իր հերթին, փորձագետ, առողջության համապարփակ ապահովագրության ներդրման հայեցակարգի մշակման աշխատանքային խմբի անդամ Սամվել Խարազյանն ընդգծել է, որ Հայաստանում 2002 թվականից բժշկական մասնավոր ապահովագրություն է կիրառվում, սակայն դրանում ընդգրկված է աշխատող բնակչության միայն 20 տոկոսը:
Նրա խոսքով`չնայած պետության ջանքերին, երկրի բնակչության շրջանում այդպես էլ չի հաջողվել խթանել պարտադիր բժշկական ապահովագրությունը։ Գործընթացին ողջ բնակչությանը ներգրավելու համար բուժապահովագրությունը պետք է պարտադիր դառնա։
Խարազյանը նշել է, որ ապահովագրական փաթեթում կներառվեն բոլոր այն ծառայությունները, որոնք այժմ հասանելի են պետպատվերի շրջանակներում, ինչպես նաև այն ծառայությունները, որոնցից առավել հաճախ են քաղաքացիներն օգտվում:
Միջազգային փորձը ցույց է տվել, որ ապահովագրության ներդրումից հետո բժշկական կենտրոններ բնակչության դիմելիության պիկը սկսվում է 5-6 ամսից։ Նա չի բացառում, որ սկզբնապես կարող են հերթեր առաջանալ, եթե մարդը ցանկանում է կոնկրետ բժշկական կենտրոնում կամ կոնկրետ մասնագետի մոտ բուժզննում անցնել։
Ինչ վերաբերում է գյուղաբնակներին, ապա հնարավոր է՝ պետությունը սուբսիդավորի նրանց ապահովագրության փաթեթը ՝ գործատուի բացակայության պատճառով։
Հիշեցնենք, որ 2019 թվականին ներկայացվել էր առողջության ապահովագրության հայեցակարգ, ըստ որի քաղաքացիները պետք է վճարեին աշխատավարձի 4-6% չափով կանխավճար։