ԵՐԵՎԱՆ, 17 հունվարի – Sputnik. Ռուսաստանյան գործատուները կարող են խոշոր տուգանքի ենթարկվել առանց ծանուցելու օտարերկրյա քաղաքացիներին աշխատանքի ընդունելու համար։ Տեղեկությունը հայտնում են ՌԴ ՆԳՆ–ից։
«Ծանուցումներ ներկայացնելու վերաբերյալ պարտավորության չկատարումը կարող է գործատուին վարչական պատասխանատվության հանգեցնել մինչև 1 մլն ռուբլու չափով տույժի կիրառմամբ», – նշել են ՌԴ ՆԳՆ–ից։
Նման կանոն է գործում անկախ ՌԴ տարածքում մշտական կամ ժամանակավոր բնակություն հաստատած օտարերկրացու կարգավիճակից, ինչպես նաև ԵԱՏՄ անդամ պետությունների քաղաքացիների համար։
Ավելի վաղ հայտնի էր դարձել, որ gosuslugi.ru կայքում աշխատանքային միգրանտների համար նոր ծառայություն է հայտնվել։
Այժմ աշխատանքային միգրանտների հետ պայմանագիր կնքելու կամ պայմանագիրը լուծարելու մասին կարելի է էլեկտրոնային ծանուցում ուղարկել ՆԳՆ։ Գերատեսչություն այցելելու կարիք չի լինի։
Մինչ այդ տեղեկատվություն էր տարածվել, որ Ռուսաստանում ավելի քիչ են սկսել աշխատանքի ընդունել միգրանտներին։ Նման ոլորտներից է շինարարությունը։
Առաջին անգամ շինարարական ոլորտում օտարերկրացիների ծառայություններից հրաժարվելու մտադրության մասին հայտարարել էր Մոսկվայի փոխքաղաքապետ Անդրեյ Բոչկարյովը։
Մոսկվայի իշխանությունները հանձնարարել էին կրճատել միգրանտների թիվը վերանորոգման ծրագրով նախատեսված շինհրապարակներում, փոխարենը աշխատանքներում ներգրավել մոտակա մարզերում ապրող ռուսաստանցիներին։
Բացի այդ, Մոսկվայի քաղաքապետ Սերգեյ Սոբյանինը հայտարարել էր, որ Մոսկվայի կոմունալ ձեռնարկությունների մեծ մասում միգրանտներ չկան։