Ռուսաստանի օդատիեզերական ուժերի ռազմատրանսպորտային ավիացիայի 19 ինքնաթիռ, որոնք Ղազախստանից վերադարձնում են ՀԱՊԿ հավաքական զորակազմի ռուս խաղաղապահներին, արդեն հայրենիքում են։ Ինքնաթիռները վայրէջք են կատարել մերձմոսվայի «Չկալովսկի» օդանավակայանում։ Տեղեկությունը հայտնում է ՌԻԱ Նովոստին։
«Ալմաթի» օդանավակայանում ռուս խաղաղապահների ստորաբաժանումները ռազմական տեխնիկայի բեռնում են իրականացրել Ռուսաստանի օդատիեզերական ուժերի ռազմատրանսպորտային ավիացիայի ինքնաթիռներում:
Երեկ խաղաղապահ զորակազմի մի մասը Ղազախստանից Ռուսաստան էր վերադարձել։ Նրանց տեղափոխման համար գործի էին դրվել 15 Իլ-76 և 3 Ան-124 ինքնաթիռներ։
Հիշեցնենք` Ղազախստանում բողոքի զանգվածային ցույցեր էին սկսվել 2022 թվականի հունվարի առաջին օրերին։ Հունվարի 4–ին և 5-ին Ալմաթիում բախումներ էին տեղի ունեցել ցուցարարների և ուժայինների միջև։
Հունվարի 5-ին Ղազախստանի նախագահ Կասիմ Ժոմարտ-Տոկաևը ստորագրել էր երկրի կառավարության հրաժարականի մասին հրամանագիրը։
Նույն օրը Տոկաևը երկրում երկշաբաթյա արտակարգ դրություն էր մտցրել։ Նա օգնության համար դիմել էր Հավաքական անվտանգության պայմանագրի կազմակերպությանը, որն այս տարի նախագահում է Հայաստանը։
ՀԱՊԿ-ը իրավիճակը կայունացնելու համար խաղաղապահ զորախումբ էր ուղարկել Ղազախստան, որոնց թվում 100 զինծառայող կար Հայաստանից։
ՀԱՊԿ խաղաղապահ զորակազմի դուրսբերումը Ղազախստանից սկսվել է հունվարի 13-ին: