Երբ ԵԱՀԿ գործող նախագահի հայտարարությունը տեղադրվեց կազմակերպության պաշտոնական կայքում, «Լեռնային Ղարաբաղի շուրջ վեճ» ձևակերպումը հանվեց տեքստից։ ԵԱՀԿ–ն աստիճանաբար տրանսֆորմացնում է արցախյան հարցի վերաբերյալ իր մոտեցումները և փորձում է գտնել այնպիսի ձևակերպումներ կամ գործունեության այնպիսի դաշտ, որը չի առաջացնում կողմերի հակազդեցությունը։ Sputnik Արմենիայի հետ զրույցում այս մասին ասաց վերլուծաբան Աննա Կարապետյանը։
«Այսօր հիմնական հակազդող կողմն Ադրբեջանն է, որպեսզի խոսվի արցախյան հակամարտության կարգավորման մասին, և արվել են մի շարք հայտարարություններ 2020 թվականի նոյեմբերից հետո, իսկ վերջինը Ալիևի կողմից հնչեց երեկ, որը պարունակում էր անհարգալից ձևակերպումներ համանախագահության հասցեին։ Ադրբեջանի նախագահը նրանց նույնիսկ «ուղարկեց թոշակի»` ասելով, որ պետք է մտածեն այն մասին, թե ինչով զբաղվեն, որ հակամարտություն չկա և արցախյան խնդրի կարգավորման մասին խոսելն ընդհանրապես տեղին չէ»,– ասաց «Հայացք» կիրառական քաղաքականության և հետազոտությունների վերլուծական կենտրոնի տնօրենը։
Կարապետյանի դիտարկմամբ` հայկական կողմից այդ ամենին, ըստ էության, որևէ հակազդեցություն չկա։ Մասնավորապես Ալիևի երեկվա հայտարարության վերաբերյալ Փաշինյանի կողմից որևէ արձագանք չեղավ և ՀՀ կառավարության նիստում ընդամենը մեկ մտահոգություն արտահայտող ձևակերպումը շատ դժվար է համարժեք արձագանք համարել։
Վերլուծաբանի կարծիքով` ստեղծված իրավիճակում ԵԱՀԿ–ն իր հերթին փորձում է չդադարեցնել իր գործունեությունը հիմնախնդրի կարգավորման առնչությամբ, փորձում է գտնել մոտեցումներ, որոնք ընդունելի կլինեն կողմերի համար, բայցևայնպես, սկսում է ընդառաջել Ադրբեջանի ագրեսիվ քաղաքականությանը` գնալով այնպիսի ձևակերպումների, որոնք աստիճանաբար ավելի են մոտենում Ալիևի հայտարարություններին ու նրա կողմից առաջ մղվող տրամաբանությանը։
«Դրանով է բացատրվում այն հանգամանքը, որ արցախյան խնդրի կարգավորման մասին խոսելու փոխարեն ձևակերպումներ են հնչում Արցախի շուրջ վեճի մասին, այսինքն` ինքնորոշման շուրջ պայքարի հակամարտության մեկնաբանությունը վերածվում է լոկ Արցախի շուրջ վեճի և նույնիսկ դա էլ հետագայում հանվեց ԵԱՀԿ նախագահի հայտարարության տեքստից։ Առհասարակ, ԵԱՀԿ–ի հայտարարությունները հետզհետե չեն արտահայտում հայկական կողմի շահերը»,– ասաց վերլուծաբանը։
Ըստ վերլուծաբանի` ՀՀ վարչապետ Նիկոլ Փաշինյանն ինքն էլ իր ձևակերպումներով դառնում է Ադրբեջանի շահը սպասարկողը, քանի որ վերջին ասուլիսի ընթացքում արեց այնպիսի հայտարարություններ, որոնք ադրբեջանական կողմը նույնիսկ միջնորդների ներկայությամբ երբևէ չէր համարձակվի անել։ Փաշինյանը շատ լուրջ հարված է հասցնում անգամ ապագայում հայկական կողմի դիրքերին և հայկական շահերն առաջ մղելու հնարավորություններին։
Նշենք, որ ԵԱՀԿ գործող նախագահ Զբիգնև Ռաուն հանդես է եկել հայտարարությամբ, որով կոչ է անում Ադրբեջանին և Հայաստանին զերծ մնալ ուժի կիրառումից և բովանդակալից երկխոսության մեջ մտնել Լեռնային Ղարաբաղի շուրջ վեճը լուծելու համար։