ԵՐԵՎԱՆ, 12 հունվարի – Sputnik. ՀՀ արդարադատության նախարարի տեղակալ Քրիստինե Գրիգորյանը, որին «Քաղաքացիական պայմանագիրն» առաջադրել է մարդու իրավունքների պաշտպանի թեկնածու, կարծում է, որ վարչապետ Նիկոլ Փաշինյանի դեռևս 2019-ին` դատարանները շրջափակելու հայտարարությունը լավը չէր։ ԱԺ «Հայաստան» խմբակցությունն այսօր հյուրընկալել էր Գրիգորյանին, այդ հանդիպման ժամանակ վերջինս նման կարծիք հայտնեց։
«Հայաստան» խմբակցության պատգամավոր Արամ Վարդևանյանը հարցրեց, թե արդյոք Գրիգորյանը կանդրադառնա 2019 թվականին վարչապետ Նիկոլ Փաշինյանի՝ դատարանների մուտքերն ու ելքերը շրջափակելու վերաբերյալ կոչին։ Ի պատասխան Գրիգորյանը նշեց, որ որևէ խնդիր չի տեսնում դրան անդրադառնալու, հատկապես, որ դրանք ՄԻՊ-ի զեկույցում էլ են արտացոլվել։
«Դե, բնականաբար, չեմ համարում, որ լավ որոշում էր. լավ որոշում չէր»,–կարճ–կոնկրետ ասաց Գրիգորյանը։
Նա այդպես էլ չպատասխանեց հարցին, թե Փաշինյանի որոշումը հակաօրինակա՞ն էր` ասելով, որ արդեն իսկ պատասխանեց հարցին։
Հիշեցնենք, որ Երևանի ընդհանուր իրավասությունների Ավան և Նոր Նորք վարչական շրջանների դատարանը՝ դատավոր Դավիթ Գրիգորյանի նախագահությամբ, 2019թ.–ի մարտի 18-ին որոշում կայացրին ՀՀ 2–րդ նախագահ Ռոբերտ Քոչարյանին անձնական երաշխավորությամբ ազատ արձակել։
Դրանից հետո մայիսի 19–ին Նիկոլ Փաշինյանը ժողովրդին կոչ արեց մայիսի 20–ի առավոտյան փակել հանրապետության բոլոր դատարանների մուտքերը։ Ապա հանդես եկավ հայտարարությամբ, որտեղ նշեց, որ Հայաստանում հեղափոխությունը պետք է իր ավարտին հասցնել և բարեփոխել դատական համակարգը` վեթինգ իրականացնելով։