ԵՐԵՎԱՆ, 11 հունվարի – Sputnik. Մայրաքաղաքի փողոցներում կրկին վաճառվում է «դեղին ձնծաղիկը»՝ Հայաստանի Հանրապետության Կարմիր գրքում գրանցված Շտերնբերգիա Ֆիշերի անվամբ ծաղիկը։ Ֆեյսբուքյան իր էջում նման տեղեկություն է հրապարակել ՀՀ շրջակա միջավայրի նախարարությունը։
«Կարմիր գրքում գրանցված բույսերի ոչնչացման կամ հավաքի համար ՀՀ օրենքով սահմանվում է տուգանք։ Մասնավորապես՝ կրիտիկական վիճակում գտնվող Շտերնբերգիա Ֆիշերի բույսի հավաքի յուրաքանչյուր հատի համար տուգանքը կազմում է 25 000 դրամ։ Բացի այդ, 200 000 դրամը գերազանցելու դեպքում՝ հնարավոր է քրեական պատասխանատվություն սահմանել»,–ասված է նախարարության հաղորդագրության մեջ։
Միաժամանակ, նախարարությունը հայտնում է, որ Շտերնբերգիա Ֆիշերը Հայաստանի Կարմիր գրքի առաջին հրատարակության մեջ ընդգրկված էր 0 կարգավիճակով` անհետացած տեսակ: Հայաստանում այն հանդիպում է միայն Զանգեզուրի ֆլորիստիկական շրջանում, Ներքին Վաչագան գյուղի շրջակայքում: Ծաղկում է փետրվար-մարտ ամիսներին։