ԵՐԵՎԱՆ, 10 հունվարի– Sputnik. ՀԱՊԿ գլխավոր քարտուղար Ստանիսլավ Զասը Հավաքական անվտանգության խորհրդի առցանց նիստի ժամանակ հայտարարեց, որ հունվարի 11-ին կմեկնի Ղազախստան:
Նրա խոսքով ՝ Ղազախստանում խաղաղապահ ուժերի զորակազմի տեղակայումն արդեն ավարտվել է։ Խաղաղապահները տեղակայվել են Նուր-Սուլթանում, Ալմաթիում և Ալմաթիի շրջանում։ Նրանք ձեռնամուխ են եղել կարևոր և պետական օբյեկտների պահպանությանն ու պաշտպանությանը, ինչպես նաև իրենց պատասխանատվության գոտիներում իրավիճակի կայունացմանը նպաստող պայմանների ստեղծմանը։
«Խաղաղապահ ուժերի գործունեությունը համակարգելու համար Ղազախստան է ուղարկվել օպերատիվ խումբ ՝ Միացյալ շտաբի պետի տեղակալի գլխավորությամբ։ Տեղում իրավիճակն ուսումնասիրելու, հրամանատարների, երկրի ղեկավարության հետ հանդիպման համար վաղը մեկնում եմ Ղազախստան»,–ասաց Զասը։
Նա հայտնել է, որ խոսել է Ղազախստանում ՀԱՊԿ-ի զորակազմի հրամանատարի հետ, և այս պահին պետությունների ղեկավարների մակարդակով լուծում պահանջող խնդիրներ չկան: Զասը հավելել է, որ սա ՀԱՊԿ-ի` նման քայլեր իրականացնելու առաջին փորձն է, և արդեն իսկ հասկանալի է, որ խաղաղապահների գործարկման մեխանիզմն աշխատում է ու կարող է կատարել իր առջև դրված խնդիրները։
Հիշեցնենք` Ղազախստանում բողոքի զանգվածային ցույցեր էին սկսվել 2022 թվականի հունվարի առաջին օրերին։ Հունվարի 4–ին և 5-ին Ալմաթիում բախումներ էին տեղի ունեցել ցուցարարների և ուժայինների միջև։
Հունվարի 5-ին Ղազախստանի նախագահ Կասիմ-Ժոմարտ Տոկաևը երկրում երկշաբաթյա արտակարգ դրություն է մտցրել։ Նա օգնության համար դիմել է Հավաքական անվտանգության պայմանագրի կազմակերպությանը, որն այս տարի նախագահում է Հայաստանը։
ՀԱՊԿ-ը իրավիճակը կայունացնելու համար խաղաղապահ զորախումբ է ուղարկել Ղազախստան, որոնց թվում 100 զինծառայող կա Հայաստանից։