ԵՐԵՎԱՆ, 9 հունվարի – Sputnik. Մեծի Տանն Կիլիկիո կաթողիկոս Արամ Առաջինը 2022 թվականը հռչակել է Սփյուռքի տարի։
Այդ մասին հայրապետական հռչակագիրն ընթերցվել է հունվարի 9-ին` Անթիլիասի Մայրավանքի Ս. Գրիգոր Լուսավորիչ Մայր Տաճարում մատուցված պատարագի ժամանակ։
Նման որոշումը պայմանավորված է Սփյուռքի ներկայիս իրավիճակով և հայի կյանքում ունեցած առանցքային դերակատարությամբ։
Հռչակագրի մեջ մասնավորապես նշված է, որ հայ ժողովուրդը բազմաթիվ մարտահրավերների է դիմագրավել, իսկ Սփյուռքը՝ ավելի շատ, քանի որ այնտեղ անորոշություն ու ինքնության փնտրտուք է տիրում։ Դրանք անհետաձգելի են դարձնում Սփյուռքի վերակազմակերպումը։
Կաթողիկոսն ընդգծել է, որ արտագաղթը մշտական երևույթ է հայոց պատմության մեջ` տնտեսական ու քաղաքական պատճառներով։ Ներկայիս Սփյուռքը ավանդական, սովետական ու հայաստանյան սփյուռքների ոչ ներդաշնակ խառնուրդ է, որտեղ հայ լինելու բնութագիրը հստակ գծեր չունի։
Նշվում է նաև, որ թեև ազգային ավանդական կառույցներն անցյալում էական դերակատարություն են ունեցել, այսօր ժամանակավրեպ դառնալու վտանգի տակ են իրենց գործելաոճով ու ոչ արդիական օրակարգով։
Այնուհետև Նորին Սրբությունը մանրամասն անդրադարձել է լեզվին, նոր սերնդին հայկական ինքնության ազդակների մեջ պահելու, ներգաղութային ու միջգաղութային հարաբերություններին, հայրենադարձությանն ու ազգային ռազմավարության ստեղծման անհրաժեշտությանը։
Արամ Առաջինը խոսքը եզրափակել է շեշտելով, որ հայ ժողովուրդը պետք է միշտ ինքն իրեն վերաարժևորի՝ փոխվող ժամանակներին ու մարտահրավերներին համահունչ, իսկ Սփյուռքը ներկա վիճակում թողնել` կնշանակի արագացնել նրա ինքամաշումը։ Սփյուռքի վերակազմակերպումը նրա, հետևաբար՝ Հայաստանի ու Արցախի հզորացումն է, ու դա համազգային առաջնահերթություն է, նշել է կաթողիկոսը։