ԵՐԵՎԱՆ, 8 հունվարի – Sputnik. Ադրբեջանական զինուժն այսօր առավոտյան կրակոցներ է արձակել Գեղարքունիքի մարզի Վերին Շորժա համայնքին կից սահմանների ուղղությամբ։ Տեղեկությունը Sputnik Արմենիային հայտնեց Վերին Շորժա համայնքի ղեկավար Արտյոմ Երանոսյանը` հավելելով, որ հայկական կողմի պատասխան գործողությունների արդյունքում հակառակորդի կրակոցները լռեցվել են։
«Գյուղում կրակոցները պարզ լսվում էին, այնքան հեռվից չէին, որ չլսվեին։ Մոտավորապես Վերին Շորժայի աջ հատվածի կողմում էր։ Կրակոցի ձայները սարերից արձագանքում է, դժվար է որոշել` ինչ տրամաչափի զենքեր են, որտեղից են։ Համենայնդեպս, նրանց մեկի փոխարեն մենք տասը կրակել ենք»,– ասաց Երանոսյանը։
Համայնքի ղեկավարը հայտնեց, որ հայկական կողմից զոհեր և վիրավորներ չկան։ Ադրբեջանական կողմի մասին տեղեկություններ չկան։
Երանոսյանը նշեց, որ սահմանապահ հենակետերը գյուղից շուրջ 3 կմ–ի վրա են տեղակայված։
Վերջին անգամ գյուղում կրակոցներ լսվել են Ամանորի գիշերը, համայնքի ղեկավարի խոսքով` դարձյալ հայկական կողմի պատասխան կրակոցների արդյունքում հակառակորդը լռել է։
Սահմանամերձ Կութ համայնքի վարչական ղեկավար Սիմա Չիթչյանն ու Նորաբակի վարչական ղեկավար Վազգեն Ասատրյանը Sputnik Արմենիային հայտնեցին, որ իրենց գյուղերի ուղղությամբ կրակոցներ չեն եղել։