ԵՐԵՎԱՆ, 7 հունվարի – Sputnik. ՀՀ տարածքային կառավարման և ենթակառուցվածքների նախարար Գնել Սանոսյանը ծանոթացել է Արարատի մարզում «Վեդիի ջրամբարի և ոռոգման համակարգի կառուցում» ծրագրի շրջանակում կառուցվող Վեդիի ջրամբարի աշխատանքների ընթացքին։ Տեղեկությունը հայտնում է ՀՀ ՏԿԵ նախարարության մամուլի ծառայությունը։
Սանոսյանին ուղեկցել են Արարատի մարզպետ Ռազմիկ Թևոնյանը, Վեդի համայնքի ղեկավարի պաշտոնակատար Գարիկ Սարգսյանը և Հայաստանի տարածքային զարգացման հիմնադրամի նախագահ Արթուր Սողոմոնյանը։
ՀՀ տարածքային կառավարման և ենթակառուցվածքների նախարար Գնել Սանոսյանը ծանոթացել է Վեդիի ջրամբարի կառուցման ընթացքին։
Նախարարին է ներկայացվել մինչ այս իրականացված և առաջիկայում պլանավորվող աշխատանքները։
Անկախ եղանակային պայմաններից՝ ջրամբարի տարածքում ակտիվ շինարարական աշխատանքները շարունակվում են։
Աշխատանքների մեկնարկից մինչև 2021թ. դեկտեմբերի 30-ն իրականացվել են.
Կուլվերտի բետոնային աշխատանքների 91.3 %-ը,
Վարարային ջրհեռի (հիդրոտեխնիկական կառույցը ծառայում է ջրամբարից ջրի ավելցուկի դուրսնետման համար` խմբ.) բետոնային աշխատանքների 89,6 %-ը,
Հորատում և ցեմենտացիոն աշխատանքների 97,3 %-ը,
Բետոնային սալի և հարթեցնող բետոնի տեղադրման 98 %-ը,
Հիմնական պատվարի մարմնի կառուցման 66,0 %-ը,
Փոքր պատվարի մարմնի կառուցման 46․2 %-ը։
Նշենք, որ Վեդու ջրամբարի պատվարի և օժանդակ կառուցվածքների կառուցման շինարարական աշխատանքները նախատեսվում էր ավարտել 2021 թվականի մարտին։ COVID-19 համավարակով և 2020թ.–ի պատերազմի և ռազմական դրությամբ պայմանավորված՝ աշխատանքների ավարտման համար անհրաժեշտություն է առաջացել պայմանագրի ժամկետը երկարաձգել և այդ կապակցությամբ ներկայումս ընթանում են քննարկումներ։
Շինաշխատանքները նախատեսվում է ավարտել 2022 թվականի դեկտեմբեր ամսին։ Նախարարը հանձնարարել է հետևողական լինել շինարարական աշխատանքների ընթացքին և դրանք ավարտել սահմանված ժամկետներին։
«Վեդիի ջրամբարի և ոռոգման համակարգի կառուցում» ծրագրի նպատակն է ապահովել ջրային ռեսուրսների և ոռոգվող գյուղատնտեսության կայունությունը Արարատյան հարթավայրի հողերում։ Տրամադրելով լրացուցիչ վերականգնվող ջրային ռեսուրսներ Վեդի գետի աջափնյա Կոտուց սելավատարի վրա Վեդու ջրամբարի կառուցման միջոցով և բարելավելով ոռոգման արդյունավետությունը՝ ցանցերի վերանորոգման և արդիականացման միջոցով:
Ծրագիրը ֆինանսավորվում է Զարգացման ֆրանսիական գործակալության վարկային միջոցներով և ՀՀ կառավարության համաֆինանսավորմամբ։ Ծրագրի ընդհանուր գումարը կազմում է 90 մլն եվրո, այդ թվում՝ վարկային միջոցներ՝ 75 մլն եվրո։ Վարկային համաձայնագիրը ստորագրվել է 2016 թվականի հունվարի 26-ին և ուժի մեջ է մտել 2016 թվականի մայիսի 12-ին:
Ծրագրի շրջանակներում կատարված ներդրումների ծավալը 2021 թվականի նոյեմբերի 30–ին կազմում է 69,5 մլն եվրո (77.0 %)։