ԵՐԵՎԱՆ, 7 հունվարի – Sputnik․ Երևանում բանկերից մեկի կառավարիչը, գլխավոր հաշվապահն ու ՊԵԿ աշխատակիցը չեն ենթարկվել պարեկների օրինական պահանջին, քաշքշել են նրանց։ Տեղեկությունը հայտնում է shamshyan.com-ը։
Դեպքը տեղի է ունեցել հունվարի 6-ին՝ Երևանում։ Կայքի տեղեկություններով՝ ժամը 05:00-ի սահմաններում Իսակովի պողոտայում պարեկները նկատել են երթևեկողBMW մակնիշի ավտոմեքենա։
Նրանք պարզել են, որ ավտոմեքենայի գույնը չի համապատասխանում հաշվառման վկայագրում նշվածին, կանգնեցրել են նշված ավտոմեքենան և երբ փորձել են վարչական ակտ կազմել, ավտոմեքենայից մի քանի քաղաքացիներ են դուրս եկել, քաշքշել պարեկներին։
Քաղաքացիների ինքնությունը հայտնի է:
Կայքը գրում է, որ վարորդը եղել է Երևանի բնակիչ, 29-ամյա Էդգար Հովհաննիսյանը, ուղևորները՝ Երևանի բնակիչներ 27-ամյա Վահե Հովհաննիսյանն ու 29-ամյա Անդրանիկ Կարապետյանը:
Նշվում է, որ Էդգար և Վահե Հովհաննիսյանները եղբայրներ են։
Ոստիկանները պարզել են, որ Էդգար Հովհաննիսյանը Պետական եկամուտների կոմիտեի աշխատակից է, Վահե Հովհաննիսյանն աշխատում է «ԷՅ ՍԻ ՍԻ Թրաասթ» ՍՊԸ-ում՝ որպես գլխավոր հաշվապահ, իսկ Անդրանիկ Կարապետյանը «Էվոկաբանկում»՝ որպես կառավարիչ:
Երիտասարդները բերման են ենթարկվել ոստիկանական բաժանմունք, ապա ազատ արձակվել։
Փաստի առթիվ նյութեր են նախապատրաստվում: