ԵՐԵՎԱՆ, 5 հունվարի – Sputnik. «Սիսական» ջոկատի լեգենդար հրամանատար, արցախյան 3 պատերազմների մասնակից Աշոտ Մինասյանը (Աշոտ Երկաթ) կմնա կալանքի տակ։ Sputnik Արմենիայի հետ զրույցում այս մասին ասաց Մինասյանի փաստաբան Միհրան Պողոսյանը։
«Ինձ դեռ պատասխան չի եկել, մամուլով եմ տեղեկացել, որ խափանման միջոցը փոխելու և քրեական հետապնդումը դադարեցնելու վերաբերյալ միջնորդությունները մերժվել են, գործի մեղադրանքային եզրակացությունն էլ հաստատվել է ու ուղարկվել դատարան»,– նշեց Պողոսյանը։
Նա ընդգծեց, որ որոշումը ստանալուց հետո 15–օրյա ժամկետում կլինի դատական նիստ, որի ժամանակ կներկայացվի «Աշոտ Երկաթի» խափանման միջոցը փոխելու վերաբերյալ միջնորդություն։
Հիշեցնենք` դեկտեմբերի 30-ին Մինասյանի պաշտպանները խափանման միջոց կալանքը փոխելու կամ վերացնելու առնչությամբ միջնորդություն էին ներկայացրել, ինչպես նաև քրեական հետապնդումը չդադարեցնելու բողոք էին ներկայացրել դատախազություն։
Նշենք, որ այժմ Աշոտ Մինասյանը մեղադրվում է միայն ՀՀ քրեական օրենսգրքի 235-րդ հոդվածի 1-ին մասով (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։ Իսկ ՀՀ վարչապետի սպանության և իշխանության յուրացման նախապատրաստման դրվագներով, իրականացվող քրեական հետապնդումը դադարեցվել է։