Ռուսական խաղաղապահ զորախմբի զինծառայողները բարեգործական ասոցիացիայի ներկայացուցիչների հետ համատեղ մարդասիրական ակցիա են կազմակերպել և անցկացրել Ստեփանակերտի մանկական վերականգնողական կենտրոնում։ Խաղաղապահներն ու բարեգործները Ռուսաստանից բերված ամանորյա նվերներ են հանձնել անապահով ընտանիքների և հաշմանդամություն ունեցող շուրջ 50 երեխայի։ Տեղեկությունը հայտնում է ՌԴ ՊՆ մամուլի ծառայությունը։
«Բարեգործական հիմնադրամների հետ համատեղ ռուս խաղաղապահները մարդասիրական ակցիա են անցկացրել Ստեփանակերտի վերականգնողական կենտրոնում, որտեղ մեր կողմից փոխանցվել են մանկական աթոռներ, ձեռքերի մոտորիկան վերականգնելու համար ավազով լցված սեղանիկ, ինչպես նաև տաք մանկական ծածկոցներ»,–ասել է ռուսական խաղաղապահ զորախմբի ներկայացուցիչ Իվան Սոկորևը։
Ակցիայի շրջանակում Ստեփանակերտի վերականգնողական կենտրոնին խաղաղապահներն ու բարեգործները 40 տաք ծածկոց, 40 աթոռ և 1 սեղան են փոխանցել։
«Այսօր մեզ խաղաղապահներն են հյուր եկել և մեզ լավ նվերներ են բերել, աթոռներ և ամենակարևորը` ավազե սեղան մանր մոտորիկան զարգացնելու համար (որի կարիքը մենք շատ ունեինք) և տաք ծածկոցներ։ Կցանկանայի մեր ամբողջ կոլեկտիվի, պացիենտների և երեխաների ծնողների անունից շնորհակալություն հայտնել նման աջակցության և օգնության համար: Շնորհակալություն ձեզ», – ասել է մանկական վերականգնողական կենտրոնի տնօրեն Վարդան Թադևոսյանը։
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին: