ԵՐԵՎԱՆ, 3 հունվարի – Sputnik. Երևանի Վարդաշեն 9-րդ փողոցում գտնվող անօթևանների կացարանի բնակիչները բողոքի ակցիա են անում աշխատանքի և սոցիալական հարցերի նախարարության դիմաց։ Նրանց խոսքով` հունվարի 1-ին կացարանը փակվել է, և բնակիչները պետք է տեղափոխվեն Հաղթանակ թաղամասում գտնվող թիվ 1 տուն–ինտերնատ։ Իրենք, սակայն, հրաժարվում են դուրս գալ Վարդաշենի կացարանից:
«Դեկտեմբերի 31-ին եկան ու ավտոբուսներ բերեցին` առաջարկելով մեզ տանել 4-րդ գյուղ։ Բայց մենք շատ լավ ծանոթ ենք այնտեղի պայմաններին և այնտեղ գնալ չենք ուզում։ Բացի այդ, կառավարության և սոցապնախարարության գրավոր որոշում չկա։ Հիմա խնդրում ենք, որ գոնե 6 ամսով մեր կազմակերպության հետ պայմանագիրը երկարացնեն»,–ասաց բնակիչներից մեկը։
Բնակիչներն ասում են` նախորդ տարի էլ Նորքի տուն–ինտերնատն էին ուզում միացնել Հաղթանակի տուն–ինտերնատին, բայց չի ստացվել, հիմա եկել ու իրենց «ջանին են կպել»։
Բողոքի ակցիա անողները հայտնեցին, որ 93 շահառու է ապրում անօթևանների կացարանում, որից 43-ն ակնողնային հիվանդ են։ Բոլորով ստորագրահավաք են արել և մեկ մարդու նման դեմ են արտահայտվում տեղափոխմանը։
«Մեզ բավարարում են եղած պայմանները, թող չհանեն մեզ մեր տեղից և ասեն` ավելի լավ պայմաններ ենք առաջարկում։ Մենք արդեն մի ընտանիք ենք դարձել` իրար հարմարվել ենք, իսկ հիմա ուզում են ուրիշ ընտանիք տանել։ Ամեն ինչ կորցրել ենք, հիմա նոր ընտանիք չենք ուզում»,–ասաց կանանցից մեկը։
Նշենք, որ բացի շահառուներից, բողոքի ակցիային են միացել նաև անօթևանների կացարանի աշխատողները։
Աշխատանքի և սոցիալական հարցերի նախարարության տարեցների հիմնահարցերի բաժնի պետ Հայկ Հարությունյանը մոտեցավ բողոքի ակցիա անողներին` առաջարկելով, որ 2 շահառու և 2 աշխատակից վերև բարձրանան, որպեսզի քննարկեն խնդիրը։ Անօթևաններն առաջարկեցին, որպեսզի կա՛մ բոլորը, կա՛մ էլ լրագրողները ներկա լինեն հանդիպմանը , սակայն նախարարության աշխատակիցը մերժեց առաջարկը։
Այս պահին բողոքի ակցիան շարունակվում է։