Անցնող տարին Հայաստանի համար ծանր էր, քանի որ պետք էր դուրս գալ սոցիալ–հոգեբանական վիճակից, որն առաջացել է Արցախյան 44-օրյա պատերազմից հետո։ 2021-ին, սակայն, եղել են նաև հաղթանակներ, որոնք բերել են մարզիկներ Արթուր Դավթյանը, Արթուր Ալեքսանյանը, Հովհաննես Բաչկովը, Մալխաս Ամոյանը, Վարազդատ Լալայանը, Էլինա Դանիելյանը, Արսեն Հարությունյանը, Սիմոն Մարտիրոսյանը, Գոռ Մինասյանը, Դավիթ Չալոյանը։
2021 թվականը նաև «պատվաստումաշատ» էր հայ ազգի համար, քանի որ COVID-19-ի դեմ պայքարի արդյունավետ միջոցներից մեկը համարվում է հենց դա։
Տարվա մեջ կորուստներ էլ եղան. կյանքից հեռացավ լեգենդար Արկադի Տեր–Թադևոսյանը (Կոմանդոս), ինչպես նաև քաղաքական գործիչ Վանո Սիրադեղյանը։
2021-ը չի անցել առանց բողոքի ակցիաների, որոնք երբեմն ուղեկցվել են փողոցներ փակելով։ Ակցիաները եղել են գերիների վերադարձի, կալանավորված անձանց ազատ արձակման, ՀՀ–ի վերաբերյալ փաստաթղթերի ստորագրման և այլ պահանջների հետ կապված։ Պատերազմի պատճառով տեղահանված արցախցիներն էլ բողոքել են, որպեսզի իրենց կարգավիճակ տրվի։
Ամենակարևոր իրադարձություններից մեկն էլ «Մանկական Եվրատեսիլում» 14-ամյա Մալենայի հաղթանակն էր. նա մրցույթում առաջին տեղը զբաղեցրեց՝ հավաքելով 224 միավոր։
Մշակութային հիշարժան իրադարձություններից էր Ալ. Սպենդիարյանի անվան օպերայի և բալետի ազգային ակադեմիական թատրոն Պյոտր Չայկովսկու «Մարդուկ-ջարդուկը» բալետային ներկայացման բեմադրությունը։