ԵՐԵՎԱՆ, 29 դեկտեմբերի – Sputnik. Թուրքական ապրանքների ներուծման արգելք սահմանելու շարժառիթը եղել է քաղաքական, հետևաբար, էմբարգոն հանելու շարժառիթը ևս պետք է լինի քաղաքական։ Այսօր` դեկտեմբերի 29-ին կայացած առցանց մամուլի ասուլիսում պատասխանելով թուրքական ապրանքների ներմուծման արգելքը երկարաձգելու վերաբերյալ Sputnik Արմենիայի հարցին, այս մասին ասաց ՀՀ էկոնոմիկայի նախարար Վահան Քերոբյանը։
«Քաղաքական առումով` գործընթացները գնում են դրական սցենարով, և, բնականաբար, քաղաքական տեսանկյունից արգելքը երկարաձգելու հիմնավորվածությունը թուլանում է»,– ասաց Քերոբյանը` միաժամանակ հավելելով, որ Թուրքիայում ընթացող տնտեսական գործընթացների ու թուքական լիրայի արժեզրկման արդյունքում թուքական ապրանքներն էլ ավելի են էժանացել ու դրանով իսկ ավելի վտանգավոր դարձել հայաստանյան արտադրողների համար։
Այդուհանդերձ, Քերոբյանը հայտնեց, որ կառավարությունում այս հարցի վերաբերյալ միասնական տեսակետ չկա։ Քննարկումները շարունակվում են, իսկ վերջնական որոշումը, նրա խոսքով, կընդունվի վաղը։
«Այդ որոշումը կարող է լինել նաև որոշման բացակայության հիմքով, այսինքն` արգելքը հանելու հիմքով»,– ասաց Քերոբյանը։
Ինչ վերաբերում է 2021թ–ի ընթացքում կիրառված էմբարգոյին, դրա ազդեցությունը ՀՀ տնտեսության վրա էկոնոմիկայի նախարարը գնահատեց թե՛ շատ դրական, թե՛ շատ բացասական։
«Շատ մեծ բացասական ազդեցություններից կարելի է առանձնացնել այս էմբարգոյի ազդեցությունը գնաճի վրա, որը մենք կարողանում ենք հստակ տեսնել։ Բայց նաև տեսնում ենք, որ բազմաթիվ նոր արտադրություններ են հիմնվել այն ոլորտներում, որոնք ազատվել են թուքական էմբարգոյի արդյունքում»,– ասաց Քերոբյանը։
Հիշեցնենք` 2020թ.-ի հոկտեմբերի 20-ին ՀՀ կառավարության ընդունած որոշմամբ Հայաստանում սահմանվեց թուրքական ապրանքների ներմուծման 6-ամսյա արգելք, որն ուժի մեջ մտավ 2021թ–ի հունվարի 1-ից։ Կես տարի անց` հունիսի 26-ի նիստում, ՀՀ կառավարությունը ևս վեց ամիս ժամկետով երկարաձգեց թուրքական ապրանքների ներմուծման արգելքը։ Այս որոշման ժամկետն ավարտվում է 2022թ–ի հունվարի 1-ին։