ՌԴ պաշտպանության նախարարությունը հայտնում է, որ Ռուսաստանի Հյուսիսային նավատորմի երգի և պարի համույթի արտիստները շնորհավորել են Լեռնային Ղարաբաղի դիտակետերում գտնվող ռուս խաղաղապահ զորախմբի զինծառայողներին Ամանորի և Սուրբ ծնունդի առթիվ: Համույթի գեղարվեստական կոլեկտիվը նոր տոնական ծրագիր է ներկայացրել։
«Համույթի համերգները կշարունակվեն մինչև ամանորյա տոների ավարտը։ Մենք նրանց հետ կշրջենք բոլոր պահակակետերով և ուղեկալներով։ Յուրաքանչյուր զինծառայողի կշնորհավորենք ու ամանորյա նվերներ կտանք», - ասել է ռուս խաղաղապահ զորախմբի ներկայացուցիչ Ալեքսեյ Պոլյուխովիչը։
Նոր Տարվա նախօրեին Արցախում ռուս խաղաղապահ զորախմբի զինծառայողները շնորհավորանքներ ու ամանորյա նվերներ են ստանում Ռուսաստանի Դաշնության տարբեր գերատեսչություններից, հասարակական կազմակերպություններից և հիմնադրամներից:
«Թեև երկար եկանք, բայց ուրախ ենք, որ այստեղ ենք։ Երբ պատրաստվում էինք, երկար մտածում էինք՝ ինչ ծրագրով գնանք։ Որովհետև հիմնականում անսամբլի երգացանկը հայրենասիրական բաղադրիչ ունի։ Բայց մտածեցինք, որ Ամանորի նախաշեմին չենք կարող լուրջ բովանդակությամբ երգեր երգել, որոշեցինք մի փոքր փոփոխել երգացանկը», - ասել է Հյուսիսային նավատորմի երգի-պարի համույթի տնօրեն Դմիտրի Ակմանովը։
Ամանորյա և Սուրբ ծննդյան տոներին համույթի անձնակազմը Արցախում ելույթ կունենա բոլոր 27 դիտակետերում ռուս խաղաղապահների և Ասկերանի, Մարտունու ու Մարտակերտի շրջանների բնակիչների համար։ Ինչպես նաև մարդասիրական ակցիայի շրջանակում Ստեփանակերտի գիշերօթիկ դպրոցում կշնորհավորեն 6-15 տարեկան երեխաներին: