Այն գործողությունները, որոնք ուղղված են Արցախում նախագահի փոփոխությանը, անթույլատրելի են, քանզի որևէ մեկը երաշխիք չի տալիս, որ դրանից հետո Արցախում ընտրություններ անցկացնելու հնարավորություն կունենանք։ Sputnik Արմենիայի հետ զրույցում այս մասին ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանը։
Ըստ նրա` այս փուլում Արցախի ներքաղաքական կյանքում ցանկացած կտրուկ, ռադիկալ քայլ անթույլատրելի է, որովհետև այսօր չունենք այն ռեսուրսները, որ դիմակայենք սպառնալիքներին, և ավելի վատ կլինի, եթե այդ ամենին գումարվի Արցախի ներքին պառակտումը։
«Եթե զուտ քաղաքական գործընթաց է, ապա ճիշտ կլինի, որ այդ մասին խոսեն Արցախի իշխանություններն ու քաղաքական ուժերը, և եթե տեղի է ունեցել օրինականությունից դուրս գործընթաց կամ դրա փորձ, ապա դրա մասին պետք է պարզաբանումներ տան համապատասխան ուժային կառույցները։ Իրականության մեջ զարգացումների հետագա ընթացքը շատ արագ նկատելի կլինի»,– ասաց ԱԺ «Պատիվ ունեմ» խմբակցության պատգամավորը։
Աբրահամյանի խոսքով` թեև ինքը շատ վատ վերաբերմունք ունի Արայիկ Հարությունյանի նկատմամբ և նրան մեղսակից է համարում Նիկոլ Փաշինյանի շատ արարքների ու քայլերի մեջ, բայցևայնպես, այստեղ խնդիրն, ըստ նրա, Արայիկ Հարությունյանը չէ, այլ Արցախի սուբյեկտայնության, պետականության սիմվոլների ապահովման հարցը, հետևաբար ցանկացած գործընթաց, որը կբերի նախագահական ինստիտուտի վերացման, դատապարտելի է։
Նշենք, որ «Հրապարակ» թերթի տեղեկատվության համաձայն` ՀՀ վարչապետը Սամվել Բաբայանի միջոցով Արցախի նախագահ Արայիկ Հարությունյանի պաշտոնանկության ծրագիր է փորձել իրականացնել՝ նախ տապալել բյուջեի ընդունումը, ապա Արցախի նախագահին անվստահություն հայտնել: Արդյունքում Արցախը կզրկվեր սուբյեկտայնությունից և այլևս նախագահ չէր կարողանա ընտրել: Սակայն Արայիկ Հարությունյանը տեղեկացել է այս դավադիր ծրագրի մասին, ընդդիմադիրների հետ խորհրդակցությունների արդյունքում հաջողվել է կանխել այս ծրագրի առաջին մասը` բյուջեն ընդունվել է:
Ըստ նույն աղբյուրի` Արցախում չեն բացառում, որ շուտով ականատես կլինենք սրա երկրորդ սերիային. Բաբայանը որոշ շրջանակների միջոցով կփորձի բողոքի ակցիաներ գեներացնել Հարությունյանի դեմ: Ի դեպ, բյուջեի նախագիծն ընդունվելուց՝ դեկտեմբերի 23-ից հետո Բաբայանը փորձել է հանդիպել Հարությունյանի հետ, սակայն նրա առաջարկը մերժվել է։