ԵՐԵՎԱՆ, 27 դեկտեմբերի - Sputnik. Վարչապետ Նիկոլ Փաշինյանը Կենտրոնական բանկում մասնակցել է Ամանորի և Սուրբ Ծննդյան տոների առթիվ կազմակերպված ընդունելությանը: Տեղեկությունը հայտնում են վարչապետի աշխատակազմից։
Նիկոլ Փաշինյանը շնորհավորել է Կենտրոնական բանկի և Հայաստանի բանկային համակարգի աշխատակիցներին գալիք տոների առթիվ, մաղթել հաջողություններ և ամենայն բարիք:
Իր խոսքում վարչապետը, մասնավորապես, անդրադարձել է ՀՀ տնտեսությանն ու դրա մեջ բանկային համակարգի դերին։
«Մեր տնտեսությունը շատ ծանր ժամանակներ է վերապրել, հույս ունեմ՝ արդեն այդպես կարող ենք ասել, որովհետև 2020 թվականից վրա հասավ կորոնավիրուսի համավարակը, ինչը ֆինանսատնտեսական համակարգին ուժեղ հարված էր, որից հետո եկավ երկրորդ հարվածը՝ պատերազմի տեսքով, այնուհետև եկավ երրորդ հարվածը՝ ներքաղաքական ճգնաժամը:
Պիտի արձանագրենք, որ այս ողջ ընթացքում ՀՀ բանկային համակարգը, որը նախկինում էլ լուրջ փորձությունների կարողացել էր դիմակայել, այս փորձությունը նույնպես հաջողությամբ անցավ, և սա չափազանց կարևոր է ոչ միան տնտեսական, այլև քաղաքական ու հոգեբանական կայունության համար»,-նշել է նա:
Վարչապետ Նիկոլ Փաշինյանը Կենտրոնական բանկում մասնակցել է Ամանորի և Սուրբ Ծննդյան տոների առթիվ կազմակերպված ընդունելությանը (27 դեկտեմբերի, 2021թ). Երևան
Փաշինյանը կարծում է, որ երկխոսությունը, որը կա կառավարության և ԿԲ-ի միջև, շատ կարևոր է ապագա ռազմավարությունները մշակելու և ներդնելու առումով:
Նա շնորհակալություն է հայտնել վերջին երկու տարվա ընթացքում ցուցաբերած դիմակայության համար ու հույս հայտնել, որ 2022-ին իսկապես հնարավոր կլինի Հայաստանում և Արցախում բոլորովին նոր տրամադրություններ ձևավորել, որոնք կերևան տոկոսադրույքների նվազման, գների, փոխարժեքների կայունության և ներդնելու, աշխատելու, ծախսելու ավելի ընդլայնված տրամադրությունների ձևով: