ԵՐԵՎԱՆ, 27 դեկտեմբերի – Sputnik. ՀՅԴ Բյուրոն հայտարարություն է տարածել Հայաստան–Թուրքիա հարաբերությունների և Արցախի հիմնախնդրի կարգավորման գործընթացների վերաբերյալ։ Տեղեկությունը հայտնում է կուսակցության պաշտոնական էջը։
Նշվում է, որ պետք է պատրաստ լինել համահայկական ընդվզման, եթե ՀՀ իշխանությունները փորձ անեն հայ ժողովրդի իրավունքների ոտնահարման ներկա դիրքորոշմամբ զարգացնել հայ-թուրքական՝ թշնամու կողմից պարտադրված օրակարգը։
Արձանագրվում է, որ պաշտոնական Անկարան ոչ միայն չի հրաժարվել Հայաստանի հետ հարաբերությունների կարգավորման իր հայտնի երեք նախապայմաններից (Հայաստանի կողմից Հայոց ցեղասպանության միջազգային ճանաչմանը սատարելուց հրաժարում, Արցախի ենթակայություն Ադրբեջանին և Հայաստան-Թուրքիա առկա միջպետական փաստացի սահմանի իրավական ամրագրում), այլև ավելացրել է չորրորդը՝ այսպես կոչված «Զանգեզուրի միջանցքի» տրամադրում։
«Հայաստան-Թուրքիա հարաբերությունների կարգավորման այս գործընթացն ի սկզբանե անառողջ է և խիստ վտանգավոր։ Ներկա պայմաններում Հայաստան-Թուրքիա հարաբերությունների կարգավորման գործընթացը հղի է աշխարհաքաղաքական, անվտանգային, քաղաքական, տնտեսական ու հոգևոր-մշակութային բազմաթիվ մարտահրավերներով ու անխուսափելիորեն կհանգեցնի անշրջելի վտանգավոր հետեւանքների ու ինքնիշխանության կորստի»,– նշում են ՀՅԴ Բյուրոյից։
Ընդգծվում է, որ Հայաստանի կողմից հատուկ բանագնացի ընտրությունն էլ հուշում է այն մասին, որ հայկական կողմն ըստ էության մասնակցում է արդեն իսկ կանխորոշված մի գործընթացի, որի հնարավորինս հայանպաստ վերջնարդյունքի ապահովման համար պրոֆեսիոնալ դիվանագետի ընտրության կարիք չի զգացվում։
Կառույցը ՀՀ իշխանություններին որոշ պահանջներ է ներկայացրել` քողազերծել Հայաստան–Թուրքիա հարաբերությունների կարգավորման գործընթացի ուղենիշները, մերժել թուրքական նախապայմանները, քաղաքական շեշտադրում անել առ այն, որ հարաբերությունների կարգավորումը չպետք է կապակցված լինել որևէ 3-րդ կողմի հետ։
«Հարաբերությունները կարող են կարգավորվել միայն աշխարհասփյուռ մեր ժողովրդի համախոհությամբ»,– հայտնում են ՀՅԴ Բյուրոյից։
Հիշեցնենք, որ հարաբերությունների կարգավորման հարցերով հանդիպմանը Հայաստանը կներկայացնի ԱԺ փոխխոսնակ Ռուբեն Ռուբինյանը, իսկ թուրքական կողմը` ԱՄՆ–ում Թուրքիայի նախկին դեսպան Սերդար Քըլըչը։
Նշենք` Հայաստանի և Թուրքիայի միջև դիվանագիտական հարաբերություններ չկան, իսկ սահմանը 1993 թվականից փակ է Անկարայի նախաձեռնությամբ։