ԵՐԵՎԱՆ, 25 դեկտեմբերի – Sputnik. Երևանի նորընտիր քաղաքապետ Հրաչյա Սարգսյանը չի պատրաստվում «Քաղաքացիական պայմանագիր» կուսակցությանն անդամագրվել։ Քաղաքապետի պաշտոնը ստանձնելու համար երդման արարողության ավարտից հետո լրագրողների հետ զրույցում հայտարարեց Երևանի նորընտիր քաղաքապետ Հրաչյա Սարգսյանը։
«Չէ, նման քննարկումներ չկան։ Ես անկուսակցական եմ և ստանձել եմ քաղաքապետի պաշտոնը, որպեսզի կառավարեմ այն ծրագրերը, որը սկսել ենք։ Միևնույն ժամանակ, պետք է վերացնեմ այն խզվածությունը, որն առկա էր գործադիր, օրենսդիր մարմինների միջև»,–ասաց Սարգսյանը` հավելելով, որ իր տեսլականը տեղավորվում է «Իմ քայլը» դաշինքի նախընտրական ծրագրում։
Լրագրողները հետաքրքրվեցին, թե ի՞նչ խզվածության մասին է խոսքը, մանավանդ, երբ վարչապետ Նիկոլ Փաշինյանն այսօր քաղաքապետի երդմնակալության արարողության ժամանակ հայտարարեց, որ այս ընթացքում մեծ ֆինանսական աջակցություն են ցուցաբերել քաղաքապետարանին։
Ի պատասխան Սարգսյանը նշեց, որ աջակցությունը միայն ֆինանսականով չէ պայմանավորված, քանի որ գումարը միայն միջոց է։
Նորընտիր քաղաքապետը նշեց, որ այս օրերին բավական շատ քննարկումներ են եղել և կրկին անդրադառնալ չի ուզում խզվածության հարցին։
Իսկ թե որն է լինելու Սարգսյանի առաջին անելիքը` վերջինս նշեց, որ տրանսպորտի բարեփոխման ծրագիրն ավարտին կհասցնի։
Նշենք, որ ըստ ԶԼՄ–ների` Երևանի քաղաքապետ Հայկ Մարությանի և իշխանության միջև հարաբերությունները լարվեցին պատերազմից հետո, քանի որ Մարությանը վարչապետ Նիկոլ Փաշինյանին աջակցող հայտարարություններով հանդես չեկավ։
Ավելին, հարաբերություններում ճեղքվածքը մեծացավ, երբ այս տարվա հունիսի 20-ին խորհրդարանական ընտրություններում Մարությանը կրկին հրապարակային կերպով չաջակցեց ՔՊ–ին։