Ընթացիկ տարում արդեն իսկ ունենք մոտ չորս տասնյակից ավելի դեպքեր, երբ կիրառվել են տնտեսվարող սուբյեկտների գործունեության կասեցումներ, ինչը նորմալ աշխատանքային գործընթացի արդյունք է: Sputnik Արմենիայի հետ զրույցում այս մասին ասաց Սննդի անվտանգության տեսչական մարմնի ղեկավար Գեորգի Ավետիսյանը։
«Ինչ վերաբերում է Ամանորի հետ կապված խնդիրներին, ապա մեր կառույցը երեկվանից բավականին ուժեղացրել է հսկողությունը տխրահռչակ ԳՈՒՄ–ի շուկայում թե՛ մսի վաճառքի կանոնները պահպանելու, թե՛ սպանդանոցային մսի 5-րդ անասնաբուժական ձևի առկայությունը ստուգելու համար։ Այդ շուկան մշտապես մեր ուշադրության կենտրոնում է, այնտեղ պարբերաբար ռեյդեր ենք իրականցնում»,– ասաց Սննդի անվտանգության տեսչական մարմնի ղեկավարը։
Ավետիսյանի տեղեկացմամբ` վերահսկողության հետ կապված կա մեկ խնդիր, որը սրվում է հատկապես ամանորյա տոներից առաջ և կապված է փողոցային առևտրի հետ, սակայն փողոցային առևտրի վերահսկողությունը ՍԱՏՄ գործառույթների մեջ չի մտնում։
«Եթե համեմատենք իրադրությունը 4-5 տարի առաջ եղած իրավիճակի հետ, ապա նկատելի է բավականին մեծ արդյունք։ Բայցևայնպես, ցուցանիշները մեզ չեն գոհացնում, քանի դեռ մարդիկ շարունակում են դռներից, պատերից կախված միս գնել, ինչը միշտ խնդրահարույց է»,– ասաց Սննդի անվտանգության տեսչական մարմնի ղեկավարը։
Նրա խոսքով` տեսչական մարմինն ունի ստուգումներ անցկացնելու մի քանի տարբերակ, որոնցից մեկը կառույցի տարեկան պլանում գրանցված տնտեսվարողների մոտ իրականացվող ստուգումներն են, մյուս տարբերակը ԶԼՄ–ների, ՀԿ–ների, սոցիալական ցանցերի կողմից եկող բողոքների հիման վրա իրականացվող ստուգումները, իսկ երրորդ տարբերակը տեսչական մարմնի թեժ գծին եկող զանգերի հիման վրա անցկացվող ստուգումներն են։
ՍԱՏՄ ղեկավարի պնդմամբ` որքան հերիքի ռուսուրսը, այնքան խստացվելու են ստուգումները, իսկ տոնական օրերին լինելու է ուժեղացված հերթապահություն։
Նշենք, որ ՀՀ սննդամթերքի անվտանգության տեսչական մարմնի տեսուչները դեկտեմբերի 22-ի երեկոյան կորոնավարակի դեմ ձեռնարկվող միջոցառումների վերահսկողությանն ուղղված ստուգայցեր են կատարել հանրապետության 30 հանրային սննդի կետերում և իրացման ցանցում:
Խախտումների արձանագրման դեպքում տնտեսվարողը նախազգուշացվում է կամ ենթարկվում վարչական պատասխանատվության 100- 300, խախտման կրկնվելու դեպքում՝ 150-ից 500 հազար դրամի չափով: