Հիմա կատարում են մի փոփոխություն, որը տրամաբանության հետ կապ չունի, այսինքն` էական չէ`մեքենան աղտոտում է օդը, թե ոչ, պարտադիր պայման է դրվել մեքենայի վրա կատալիզատորի առկայությունը։ Օրենսդրական փոփոխության մասին Sputnik Արմենիայի եթերում նման կարծիք հայտնեց «Վարորդի ընկեր» ՀԿ–ի ղեկավար Տիգրան Քեյանը։
Օրինագծում կա արտոնյալ անցումային դրույթ, ըստ որի` մինչև 2020 թվականը ներմուծված մեքենաների մասով տվյալ դրույթը չի կիրառվելու։ Քեյանի խոսքով` այն առաջացնելու է որոշակի խնդիրներ։
«Նախ պետք է 2020 թվականից հետո ներկրվող մեքենաների դեպքում գործեր արգելք։ Եթե տրանսպորտային միջոցը ներկրվում էր առանց կատալիզատորի, չէր համապատասխանում չափանիշներին, ապա ինչու էին թույլատրում ներկրումը։ Բայց քանի որ նախագիծն այդ ժամանակ կյանքի չկոչվեց, մեքենաները ներմուծվեցին և հիմա սահմանվող արգելքը վարորդներին կանգնեցնում է լուրջ խնդիրների առջև»,– ասաց «Վարորդի ընկեր» ՀԿ–ի ղեկավարը։
Քեյանի տեղեկացմամբ` 2020 թվականից հետո ներմուծված շատ մեքենաներ չեն ունեցել կատալիզատորներ, մյուս կողմից էլ քիչ չեն դեպքերը, երբ մեքենաների վրայից գողացել են կատալիզատորները, մինչդեռ այդ հանցագործությունները չեն բացահայտվել, քաղաքացիների վնասը չի փոխհատուցվել։ Այդ քաղաքացիներն այժմ կանգնել են ավելի լուրջ խնդրի առջև, քանի որ ստիպված են բավականին թանկ արժեցող զտիչ սարքեր` կատալիզատորներ տեղադրել։
«ՇՄ նախարարության օրինագիծը նպատակային չէ։ Եթե մեզ մոտ ցանկանում են առաջնորդվել արտասահմանյան փորձով, ապա չեմ կարծում, որ պետք է բոլորի հետ հարաբերվեն նույն չափանիշներով։ ։ Միակ ճիշտ լուծումը կլիներ օրենսդրական ամբողջ փաթեթի փոփոխությունը, ըստ որի` այն մեքենան, որն ավելի շատ է աղտոտում օդը, պետք է շահագործումից հանվի կամ համապատասխան վճարների միջոցով սահմանափակվի դրա ձեռքբերումն ու շահագործումը»,– ասաց «Վարորդի ընկեր» ՀԿ–ի ղեկավարը։
Քեյանի համոզմամբ` օրինագծի տարածումը միայն 2020 թվականից հետո ներկրված մեքենաների վրա հարցի լուծում չէ, որովհետև վերջին երեք տարվա ընթացքում տասնյակ հազարավոր մեքենաներ ներմուծվել են Հայաստան։ Օրենսդրական դրույթի կիրառմամբ մարդիկ կհայտնվեն ծանր վիճակի մեջ, քանզի մեքենաների վրա կատալիզատորների տեղադրումը բավականին թանկարժեք գործ է, և պատահական չէ, որ հաճախ գողերի թիրախ են դառնում հենց կատալիզատորները։
Ըստ նրա` եթե 2006-2007 թվականների մինչև 8000 դոլար արժողությամբ ավտոմեքենայի կատալիզատորը արժեր մոտ 350 000 դրամ, ապա կարելի է պատկերացնել, թե որքան կարժենան նոր մեքենաների կատալիզատորները։
Քեյանի խոսքով` բնապահպանական հարկի նման գանձումը ճիշտ չէ և չի լուծում այն խնդիրը, որն ընկած է այդ հարկի կիրառելիության բուն նպատակի հիմքում։
Նշենք, որ Հայաստանի շրջակա միջավայրի նախարարությունը շրջանառության մեջ է դրել օրինագիծ, ըստ որի՝ ավտոմեքենաների սեփականատերերը (ֆիզիկական անձինք), որոնց մեքենաները ներկրվել են 2020 թվականի հունվարի 1-ից հետո և շահագործվում են առանց կատալիզատորների, կարող են տուգանվել 300 000 դրամի չափով։ Իրավաբանական անձանց առաջարկվում է տուգանել 500 000 դրամով։
Օրինագծի համաձայն՝ կրկնակի խախտման դեպքում ավտոմեքենաների սեփականատերերը կրկնակի չափով տուգանք կվճարեն։