ԵՐԵՎԱՆ, 23 դեկտեմբերի – Sputnik. Այն իրավիճակը, որ ունեցանք Երևանի քաղաքապետարանում, ինստիտուցիոնալ իրավիճակ էր և ինստիտուցիոնալ խնդիր: Երևանի նորընտիր քաղաքապետ Հրաչյա Սարգսյանին այսօր ընդունելով`նման հայտարարություն է արել վարչապետ Նիկոլ Փաշինյանը։ Տեղեկությունը հայտնում է վարչապետի պաշտոնական կայքը` հավելելով, որ վարչապետը շնորհակալություն է հայտնել Երևանի ավագանու «Իմ քայլը» խմբակցությանը սկզբունքային դիրքորոշում ցուցաբերելու համար։
Դեկտեմբերի 17-ին «Իմ քայլը» խմբակցությունը մուտքագրել էր արդեն իսկ նախկին քաղաքապետ Հայկ Մարությանին անվստահություն հայտնելու նախագիծը։ Երեկ ավագանու նիստի ժամանակ 44 կողմ, 10 դեմ, 3 անվավեր ձայներով Երևանի նոր քաղաքապետ ընտրվեց Հրաչյա Սարգսյանը:
«Ի վերջո, Երևանում 2018 թվականի աշնանից սկսած իրականացվում է «Իմ քայլը» դաշինքի նախընտրական ծրագիրը, և քաղաքական պատասխանատվությունն էլ «Իմ քայլը» դաշինքինն ու քաղաքական մեծամասնությանն է: Ուզում եմ ընդգծել, որ այդ ծրագիրն էլ իր հերթին բխում էր 2017 թվականի Երևանի ավագանու ընտրություններում «Ելք» դաշինիքի նախընտրական ծրագրի հիմնադրույթներից»,–ասել է նա։
Փաշինյանի խոսքով` ինստիտուցիոնալ առումով անհնար է համայնքի ղեկավարի աշխատանքը՝ առանց ավագանու մեծամասնություն ունենալու. սա պարզ քաղաքական տրամաբանություն է, և այս խնդիրն է, որ հանգուցալուծվեց: Վարչապետը նշել է, որ այսօր ներդաշնակ իրավիճակ է Երևանի քաղաքապետի, ավագանու և քաղաքական մեծամասնության միջև: Նա նաև վստահեցրել է, որ Երևանի քաղաքապետարանն ունի կառավարության և իր լիարժեք աջակցությունը:
Երևանի քաղաքապետ Հրաչյա Սարգսյանն էլ իր հերթին նշել է, որ ընդհանուր առմամբ պատկերացնում է, թե ինչ ինստիտուտներ կան, որոնք պետք է ամբողջությամբ վերափոխեն և որոնք են, որ դեռևս կաշխատեն որպես ինստիտուտներ, որպեսզի դիմադրեն տարբեր ցնցումների: «Կարծում եմ՝ կառավարության աջակցությամբ հնարավորություն կունենանք ամենամեծ բնակչություն ունեցող համայնքում՝ Երևանում, իրականացնել այն ծրագրերը, որոնք տարիների ընթացքում չեն իրականացվել, կարելի է ասել, անհասկանալի պատճառներով: Կարծում եմ՝ պոտենցիալը կա, պետք է պարզապես արդյունավետ կառավարում իրականացնել այդ պոտենցիալն օգտագործելու համար»,–ասել է նա։
Հիշեցնենք, որ 2018թ. սեպտեմբերի 23-ին կայացած Երևանի ավագանու ընտրությունների արդյունքներով Հայկ Մարությանն ընտրվեց Երևանի քաղաքապետ: Ինչ վերաբերում է նորընտիր քաղաքապետին` Հրաչյա Սարգսյանին, ապա նա մինչ այս զբաղեցնում էր Երևանի քաղաքապետի առաջին տեղակալի պաշտոնը։ Վերջինս այդ պաշտոնը ստանձնել էր 2018թ. հոկտեմբերի 29-ին Երևանի ավագանու նիստում։