ԵՐԵՎԱՆ, 21 դեկտեմբերի – Sputnik. ՀՀ Ազգային ժողովի նախագահ Ալեն Սիմոնյանը, ՀՀ արտգործնախարար Արարատ Միրզոյանը և Ամենայն Հայոց կաթողիկոս Գարեգին Երկրորդը այսօր ընդունել են Ֆրանսիայի Իլ դը Ֆրանս կենտրոնական շրջանի ղեկավար, Ֆրանսիայի նախագահի թեկնածու Վալերի Պեկրեսի գլխավորած պատվիրակությանը։
Ալեն Սիմոնյանն իր խոսքում նշել է, որ Հայաստան այցելությունների թվով Ֆրանսիան բացարձակ առաջատար է, ինչի հիմքում են երկու ժողովուրդների միջև դարավոր բարեկամական հարաբերություններն են, հայտնում են ԱԺ մամուլի ծառայությունից։
Սիմոնյանը երախտագիտություն է հայտնել Պեկրեսին Լեռնային Ղարաբաղի ճանաչման վերաբերյալ ընդունած բանաձևի, ինչպես նաև պատերազմի հետևանքով տեղահանված բնակչության կարիքներին ուղղված 75 հազար եվրո օգնություն հատկացնելու համար:
Պեկրեսն իր հերթին կարևորել է Հայաստանի հետ բազմաբևեռ փոխգործակցությունը: Նրա խոսքով՝ երկու երկրները նույնական համամարդկային արժեքների կրողն են եւ Հայաստանին վերաբերող խնդիրները չեն կարող անտարբեր թողնել Ֆրանսիային:
ՀՀ ԱԳ նախարար Արարատ Միրզոյանը ևս ընդունել է Պեկրեսի գլխավորած պատվիրակությանը, հայտնում են ԱԳՆ մամուլի ծառայությունից։
Կարևորվել է Հայաստանի և Ֆրանսիայի միջև փոխշփումների շարունակական ակտիվացումը, կրթության ու գիտության, մշակույթի և մի շարք այլ ոլորտներում համագործակցության առավել զարգացումը։
Հանդիպման ընթացքում անդրադարձ է կատարվել տարածաշրջանային անվտանգության և կայունության հարցերին։
ՀՀ ԱԳՆ-ից հայտնում են, որ քննարկվել են նաև հրատապ լուծում պահանջող հումանիտար խնդիրները, մասնավորապես՝ հայ ռազմագերիների ու այլ պահվող անձանց շուտափույթ հայրենադարձման, Ադրբեջանի վերահսկողության տակ անցած տարածքներում Արցախի մշակութային և կրոնական ժառանգության պաշտպանության հարցերը:
Ամենայն Հայոց կաթողիկոս Գարեգին երկրորդը Պեկրեսի հետ հանդիպմանն իր երախտագիտությունն է հայտնել Ֆրանսիայի իշխանություններին և ժողովրդին Հայոց ցեղասպանության միջազգային ճանաչման և Արցախի հիմնախնդրի կարգավորմանն ուղղված ջանքերի, ինչպես նաև 44–օրյա պատերազմի և հետպատերազմյան շրջանում Հայաստանին ցուցաբերած աջակցության համար՝ կարևորելով Ֆրանսիայի սենատի կողմից Արցախի անկախության ճանաչման բանաձևի ընդունումը։
Զրույցի ընթացքում անդրադարձ է կատարվել Ադրբեջանի վերահսկողության տակ անցած տարածքներում պատերազմի ընթացքում վնասված հայկական եկեղեցիների վերականգնման խնդրին՝ կարևորելով միջազգային կառույցների միջնորդական ջանքերը։
Նշենք, որ ավելի վաղ ՀՀ նախագահ Արմեն Սարգսյանը ընդունել էր Ֆրանսիայի նախագահի թեկնածու Վալերի Պեկրեսի գլխավորած պատվիրակությանը։