ԵՐԵՎԱՆ, 21 դեկտեմբերի – Sputnik. ՀՀ երկրորդ նախագահ Ռոբերտ Քոչարյանի և նախկին փոխվարչապետ Արմեն Գևորգյանի դեմ հարուցված քրգործով դատական նիստի ժամանակ այսօր դատարան ներկայացվեց միջնորդություն, որպեսզի թույլտվություն տան Գևորգյանին ժամանակավորապես մեկնել երկրից։
Նշենք, որ նիստն ընթանում է Երևան քաղաքի ընդհանուր իրավասության դատարանում` Աննա Դանիկեբյանի նախագահությամբ։ Նիստին ներկա են ինչպես Քոչարյանը, այնպես էլ Գևորգյանը։
Գևորգյանին ժամանակավորապես երկրից հեռանալու թույլտվություն տալու միջնորդությունը ներկայացրեց վերջինիս պաշտպան Լուսինե Սահակյանը` ասելով, որ իր պաշտպանյալը պետք է ԵԽԽՎ նիստին մասնակցի։
«Հունվարի 24-28-ը Ստրասբուրգում ԵԽԽՎ-ի հերթական նիստը պետք է տեղի ունենա, Գևորգյանը պետք է մասնակցի դրան։ Հարցն այն է, որ դեկտեմբերի 14-ին նշանակված նիստն էլ խնդրել էինք հետաձգել, քանի որ Գևորգյանն առցանց պետք է մասնակցեր ԵԽԽՎ մոնիթորինգի հանձնաժողովի նիստին։ Սակայն դատական նիստը չհետաձգվեց»,–ասաց Սահակյանը։
Արմեն Գևորգյանն իր հերթին նշեց, որ նախորդ ԵԽԽՎ նիստը բաց թողնելու հետևանքով որպես ընդդիմության ներկայացուցիչ` իր պարտականությունները տապալվել են։
Քրեական գործով դատախազներն առարկեցին միջնորդությունը` ասելով, որ այն հիմնավոր չէ։ Ի վերջո դատավորը հայտարարեց` քանի որ դատարան չի ներկայացվել ամբողջական տեղեկատվություն Գևորգյանի` ՀՀ–ից մեկնելու հստակ ժամանակահատվածի առնչությամբ, ինչպես նաև ԱԺ նախագահի համապատասխան կարգադրությունը, ուստի միջնորդության քննությունը հետաձգվում է։
Այն կքննարկվի` երբ դատարան կներկայացվեն անհրաժեշտ բոլոր փաստաթղթերը։
Նշենք, որ ՀՀ երկրորդ նախագահ Ռոբերտ Քոչարյանին առանձնապես խոշոր չափերի կաշառք ստանալու, իսկ նախկին փոխվարչապետ Արմեն Գևորգյանին՝ փողերի լվացման մեղադրանք է առաջադրվել։