ԵՐԵՎԱՆ, 19 դեկտեմբերի – Sputnik․ Ադրբեջանի և Թուրքիայի արտգործնախարարներ Ջեյհուն Բայրամովն ու Մևլյութ Չավուշօղլուն այսօր քննարկել են «3+3» ձևաչափով տարածաշրջանային համագործակցության հարթակի իրագործման հարցերը (Ադրբեջան, Հայաստան, Վրաստան, Ռուսաստան, Թուրքիա, Իրան), փոխանցում է ՏԱՍՍ–ը։
Հանդիպումը կայացել է Իսլամաբադում՝ Իսլամական համագործակցության կազմակերպության արտգործնախարարների խորհրդի հերթական նիստի շրջանակում։
«Կողմերը քննարկել են Ադրբեջանի և Թուրքիայի առաջնորդների նախաձեռնած «3+3» համագործակցության ձևաչափի առաջին հանդիպման (Մոսկվայում կայացած) արդյունքները։ Շահագրգռվածություն են արտահայտել առաջ մղելու համագործակցության այս մեխանիզմը», – ասվում է հաղորդագրության մեջ։
Նախարարները քննարկել են նաև Հարավային Կովկասում ընթացիկ իրավիճակը, Արցախի գծով եռակողմ պայմանավորվածությունների իրականացումն ու հետպատերազմյան շրջանում տարածաշրջանի երկրների միջև հարաբերությունների կարգավորման հետ առնչվող հարցեր։
Հիշեցնենք՝ «3+3» խորհրդատվական տարածաշրջանային պլատֆորմի առաջին նիստը տեղի է ունեցել Մոսկվայում դեկտեմբերի 10-ին` Ռուսաստանի (Ռուդենկո), Հայաստանի (Գևորգյան), Ադրբեջանի (Խալաֆով), Թուրքիայի (Օնալ) արտաքին գործերի նախարարների տեղակալների, ինչպես նաև Իրանի ԱԳՆ գլխավոր տնօրեն Հագիգիանի համանախագահությամբ: Վրաստանի ներկայացուցիչները, որոնք նույնպես հրավիրվել էին, ձեռնպահ են մնացել հանդիպմանը մասնակցելուց: