ԵՐԵՎԱՆ, 18 դեկտեմբերի – Sputnik, Դավիթ Գալստյան. Հայաստանի տարածքում Երասխ-Ջուլֆա-Օրդուբադ-Մեղրի-Հորադիզ երկաթուղու հսկողություն իրականացնելու հարց չի քննարկվում։ Sputnik Արմենիայի հարցմանն ի պատասխան հայտնեցին փոխվարչապետ Մհեր Գրիգորյանի գրասենյակից:
«Նման հարց չի քննարկվում: Երկաթուղին կգործի սահմանային և մաքսային միջազգայնորեն ընդունված կանոնների համաձայն՝ փոխադարձության սկզբունքով և երկրների ինքնիշխանության և իրավազորության ներքո», - նշված է փոխվարչապետի պատասխանում։
Նրա խոսքով՝ Երասխ-Ջուլֆա-Օրդուբադ-Մեղրի-Հորադիզ երկաթուղու երկարությունը կկազմի մոտ 340 կմ, որից 45-ը կանցնի Հայաստանի Հանրապետության տարածքով:
Փորձագետների նախնական գնահատականներով՝ Հայաստանի հատվածում երկաթգծի վերականգնողական աշխատանքների ինդիկատիվ բյուջեն կկազմի մոտ 200 մլն դոլարի համարժեք գումար։
«Այս պահին շինարարական աշխատանքների մեկնարկի հստակ ժամկետներ չեմ կարող նշել, բայց փոխադարձ տրամադրվածություն կա արագ հստակեցնել այս մասով պայմանավորվածությունները և անմիջապես սկսել աշխատանքները: Փորձագետների նախնական վերլուծության համաձայն՝ ամբողջական վերականգման աշխատանքները հնարավոր է ավարտել մինչև 36 ամսվա ընթացքում», - նշված է պատասխանում։
Երկաթուղային կայանների տեղակայման հարցը, նրա խոսքով, կհստակեցվի վերջնական նախագծում:
Հիշեցնենք` դեկտեմբերի 16-ին ՀՀ վարչապետ Նիկոլ Փաշինյանը հաստատեց, որ Սոչիում (Ռուսաստանի նախագահ Վլադիմիր Պուտինի միջնորդությամբ) ու Բրյուսելում (Եվրոպական խորհրդի նախագահ Շառլ Միշելի միջնորդությամբ) Ադրբեջանի նախագահ Ալհամ Ալիևի հետ հանդիպումների ժամանակ երկաթգիծը (որը գոյություն է ունեցել դեռ խորհրդային տարիներին) կառուցելու պայմանավորվածություն է ձեռք բերվել: Վարչապետը հանձնարարել է նախապատրաստական աշխատանքներ սկսել հայկական ճանապարհահատվածներում շինարարություն սկսելու համար։