Միջուկային ծրագրի շուրջ բանակցությունների այս փուլում Իրանի և ՌԴ–ի միջև 20-ամյա ռազմավարական համաձայնագիր կնքելու հայտարարությունը կարող է օգտագործվել որպես խաղաքարտ, Sputnik Արմենիայի հետ զրույցում նման կարծիք հայտնեց իրանագետ Ահարոն Վարդանյանը։
Իրանի ԱԳՆ պաշտոնական ներկայացուցիչ Սաիդ Խաթիբզադեն դեկտեմբերի 11-ին հայտարարել է, որ իրանական ու ռուսական կողմերը մոտ են 20 տարի ժամկետով համապարփակ համագործակցության փաստաթղթի մշակման աշխատանքների ավարտին։
«Ռուսաստանի և Իրանի միջև համաձայնագրի կնքումը միանգամայն հնարավոր է, սակայն այդ հայտի մասին հայտարարելով` պաշտոնական Թեհրանը մեսիջ է ուղարկում ԱՄՆ–ին առ այն, որ եթե հանկարծ միջուկային ծրագրի շուրջ բանակցություններում որևէ արդյունք չգրանցվի և ձախողվի միջուկային համաձայնագրի կնքումը, ապա Իրանը ձեռքերը ծալած չի նստի և ԱՄՆ–ի հիմնական մրցակից պետության հետ կկնքի ռազմավարական համապարփակ համաձայնագիր»,– ասաց Վարդանյանը։
Իրանագետի դիտարկմամբ`դա կարող է մեծ ռիսկ պարունակել Միացյալ Նահանգների համար, առավել ևս որ Ռուսաստանը նմանատիպ համաձայնագիր արդեն իսկ կնքել է Չինաստանի հետ, հետևաբար այս գործարքի մասին խոսակցություններն ավելի արդիական դարձան այն պահից սկսած, երբ ԱՄՆ–ն դեռ չէր կողմնորոշվում միջուկային ծրագրի շուրջ ընթացող բանակցություններին վերստին միանալու հարցում։
Վարդանյանի խոսքով` ԱՄՆ–ն կարծես թե ընկալել է իրանական ուղերձի էությունը, որովհետև բանակցությունները Վիեննայում վերսկսվել են։ Ըստ նրա` հիմա հակառակ գործընթաց է տեղի ունենում, և եթե պատժամիջոցները չչեղարկվեն, իրավիճակը մնա այնպիսին, ինչպիսին կա մինչ օրս, ապա Իրանը կգնա Ռուսաստանի հետ նախանշված ճանապարհով։
Հիշեցնենք` 2015 թվականին «վեցյակի» (Մեծ Բրիտանիա, Գերմանիա, Չինաստան, Ռուսաստան, ԱՄՆ, Ֆրանսիա) ու Իրանի կնքած Գործողությունների համատեղ համապարփակ ծրագիրը (ԳՀՀԾ), որը ենթադրում էր պատժամիջոցների վերացում՝ Իրանի միջուկային ծրագրի սահմանափակման դիմաց՝ որպես Թեհրանի կողմից միջուկային զենք չստանալու երաշխիք, երեք տարի էլ գոյություն չունեցավ։ 2018 թվականի մայիսին ԱՄՆ նախագահ Դոնալդ Թրամփը հայտարարեց, որ ԱՄՆ–ն միակողմանի կարգով դուրս է գալիս ծրագրից ու վերականգնում Թեհրանի դեմ խիստ պատժամիջոցները։
Նոյեմբերի 29-ին Վիեննայում վերսկսվեցին ԳՀՀԾ–ն վերականգնելու և Իրանի դեմ ամերիկյան պատժամիջոցները չեղարկելու շուրջ բանակցությունները։