«Մամիկոն Ասլանյան» դաշինքի առաջնորդ, Վանաձորի նախկին քաղաքապետ Մամիկոն Ասլանյանի ձերբակալությունը և նրան կալանավորելու միջնորդությունը ակնհայտ ապօրինի է։ Sputnik Արմենիայի հետ զրույցում ասաց Ասլանյանի փաստաբան Լուսինե Սահակյանը։
Նրա կարծիքով` իր պաշտպանյալի ձերբակալությունը վերջին ՏԻՄ ընտրություններում ոչ իշխանական քաղաքական ուժերի նկատմամբ իրականացվող ճնշումների տրամաբանական շարունակությունն է։ Ասում է` այն համայնքներում, որտեղ իշխանության թեկնածուները պարտվել են, ընդդիմադիրներին չեզոքացնելու համար ՔՊ-ն գործի է դնում բոլոր հնարավոր լծակները։
«Բոլորի համար էլ տեսանելի է, որ ակնհայտ քաղաքական հետապնդում է իրականացվում։ Մենք տեսնում ենք, թե հանրապետության տարածքում ինչ է կատարվում, բոլոր այն տարածքներում, որտեղ ՔՊ-ն չի կարողացել հաղթել, փորձում են այս եղանակով վիժեցնել գործընթացը»,- ասաց Սահակյանը։
Նրա խոսքով` Վանաձորում ավագանու առաջին նիստը նախատեսված էր առաջիկա օրերին, որի ժամանակ ավագանին ընտրելու էր համայնքի ղեկավարին, մինչդեռ ՏԻՄ ընտրություններում առավելագույն քվեներ ստացած քաղաքական ուժի առաջին համարին կալանավորելու միջնորդություն է ներկայացվել։
«Փորձելու են խոչընդոտել ընտրական գործընթացներին։ Կարծում եմ, որ իրենց մոտ ոչինչ չի ստացվի»,- հավելեց փաստաբանը։
Նշենք, որ դատարանն այս պահին քննում է Մամիկոն Ասլանյանին կալանավորելու միջնորդությունը։ Մամիկոն Ասլանյանին մեղադրանք է առաջադրել ՀՀ Քրեական օրենսգրքի 309-րդ հոդվածի (պաշտոնեական լիազորություններն անցնելը) 3-րդ մասով, 308-րդ հոդվածի (պաշտոնեական լիազորությունները չարաշահելը) 1-ին մասով ու 2-րդ մասերով (2 դրվագ), 314-րդ հոդվածի (պաշտոնեական կեղծիքը) 1-ին մասով։
Հիշեցնենք, որ 2021 թվականի հոկտեմբերի 10-ին լրացավ Վանաձորի քաղաքապետ Մամիկոն Ասլանյանի պաշտոնավարման 5 տարին: Վանաձոր համայնքի ղեկավարի ժամանակավոր պաշտոնակատար նշանակվեց Վանիկ Օհանյանը։
Դեկտեմբերի 5-ին անցկացված ՏԻՄ ընտրությունների արդյունքներով Լոռու մարզի Վանաձոր քաղաքում «Մամիկոն Ասլանյան» կուսակցությունների դաշինքն ամենաշատ ձայներն է հավաքել` 12 810 քվե կամ 38.70 տոկոս ձայն։ «Քաղաքացիական պայմանագիր» կուսակցությունը 25.06 տոկոս ձայն է ստացել, իսկ երրորդ տեղում է Հայաստանի աշխատավորական սոցիալիստական կուսակցությունը` 14.53 տոկոսով։