ԵՐԵՎԱՆ, 16 դեկտեմբերի – Sputnik. ԱՄՆ Վեսթբրուքի քաղաքային խորհուրդը միաձայն իր նախագահ է ընտրել Աննա Թերքոթ–Աստվածատուրյանին, ով այդ պաշտոնում առաջին ներգաղթյալն է և առաջին կինը: Այս մասին տեղեկացնում է Portland Press Herald ամերիկյան ամսագիրը։
Քաղաքային խորհուրդը հայտնել է, որ Աննա Աստվածատուրյանին ընտրել են, քանի որ փախստականները երկրում գնալով շատանում են, հետևաբար առաջանում է ներկայացուցիչ ունենալու անհրաժեշտությունը։
«Ես անհամբերությամբ եմ սպասում քննարկումներին, որտեղ որպես միջնորդ կհանդիսանամ փախստականների աջակցման հարցում։ Իմ հիմնական նպատակներից մեկն է նաև ավելի սերտորեն համագործակցել դպրոցների հետ բյուջեի հարցերով»,– ասել է Աստվածատուրյանը։
Նշվում է, որ վերջինս ծնվել է Ադրբեջանում, սակայն, երբ նա դեռ երեխա է եղել, ընտանիքը ստիպված է եղել լքել Բաքուն` հայերի դեմ իրականացվող հարձակումների պատճառով։ Ընտանիքը 3 տարի ապրել է Հայաստանում, ինչից հետո տեղափոխվել են ԱՄՆ։ Նա Վեսթբրուքում ապրում է արդեն 30 տարի։
Թերքոթը Բաքվում երկար ժամանակ մասնագիտացած է եղել միջազգային իրավունքի ոլորտում։ ԱՄՆ–ում Աստվածատուրյանը սովորել է իրավաբանական դպրոցում, այնուհետև աշխատել Հաագայի Միջազգային քրեական դատարանում։ 2021-ին հրապարկել է Բաքվի ջարդերի իր օրագիրը` «Ոչ մի տեղ. աքսորի պատմություն» վերնագրով։
ԱՄՆ Մեն նահանգում նա քաղաքական կարիերան սկսել է 2013 թվականից, երբ սկսել է աշխատել Արցախի Հանրապետության պաշտոնապես ճանաչման ուղղությամբ։ Մի քանի տարի անց դարձել է Վեսթբրուքի քաղաքային խորհրդի անդամ։