Ռուս խաղաղապահ զորախմբի զինծառայողներն ապահովել են Լեռնային Ղարաբաղի Մարտունու շրջանի Մաճկալաշեն գյուղում սահմանազատման գծի մոտ գյուղատնտեսական մշակաբույսերի ցանքատարածությունների անվտանգությունը։
ՌԴ պաշտպանության նախարարությունը հայտնում է, որ մեկ շաբաթվա ընթացքում ռուս խաղաղապահների աջակցությամբ բնակիչներն ավելի քան 40 հա ցանքատարածությունում տարբեր մշակաբույսերի սերմեր են ցանել:
Լեռնային Ղարաբաղի հեռավոր շրջաններում բնակիչների անվտանգությունն ապահովելու համար կազմվում է ժամանակացույց։Խաղաղապահները խնդիրների առաջնահերթությունը որոշելիս հաշվի են առնում քաղաքացիների այն մտահոգությունները, որոնք Ստեփանակերտում հանրային ընդունելության ժամանակ նրանք հայտնել են ռուս խաղաղապահներին:
Ռուսական խաղաղապահ զորակազմի հումանիտար արձագանքման կենտրոնի մասնագետները տարածաշրջանում անվտանգության ապահովման տարբեր խնդիրներ են իրականացնում, այդ թվում օգնում են քաղաքացիական անձանց գյուղատնտեսական, ինժեներական և կանխարգելիչ աշխատանքներում։
Մասնագետները նաև օգնում են ուխտավորներին այցելել Լեռնային Ղարաբաղի սահմանազատման գծի մոտ գտնվող վանական համալիրներ:
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին: