Կորոնավիրուսով վարակված մարդկանց բուժումը վճարովի դարձնելուց առաջ պետք է մի լավ ծանրութեթև անել, հաշվարկել այն բոլոր բացասական ելքերը, որոնց կարող է բերել համաճարակի բուժումը վճարովի դարձնելու առողջապահության նախարարության տեսլականը։ Sputnik Արմենիայի հետ զրույցում ասաց առողջապահության ոլորտի փորձագետ Դավիթ Մելիք-Նուբարյանը։
Փորձագետը համոզված է, որ այս որոշումը, որը հիմնականում միտված է պատվաստումների խթանմանը, ճիշտ հակառակ ազդեցություն կարող է ունենալ։ Նրա կարծիքով` չպետք է գնալ լուրջ վտանգներ պարունակող ճանապարհով։
«Պետք է շատ խորը մտածել, սա կարող է նպաստել, որ համաճարակի ալիքն ավելի երկար տևի, համավարակի հետևանքով առաջացած ծանր դեպքերի թիվն ու մահվան դեպքերի թիվն ավելանա և քաղաքացիներն ու հիվանդանոցներն ընկնեն քաշքշուկների մեջ»,- պարզաբանեց նա։
Բացի այդ, հնարավոր է` «շառլատանները» գլուխ բարձրացնեն, կորոնավարակակիրներին տնային պայմաններում բուժվելու տարբերակներ առաջարկեն, ինչը ևս մեծամասամբ ունենալու է բացասական հետևանք։ Ինքնաբուժությամբ զբաղվողների դեպքում էլ հիվանդությունը կարող է խորանալ։
«Մարդն էլի ինչ-որ մի փուլում, բայց ավելի ծանր, հայտնվելու է հիվանդանոցի դռանը։ Հիվանդանոցն էլ ստիպված է լինելու այդ մարդուն հոսպիտալացնել, որովհետև «Բժշկական օգնության և սպասարկման» մասին օրենքը սահմանում է, որ կյանքին սպառնացող դեպքերում հիվանդանոցը, անկախ ֆինանսական փոխհատուցման հանգամանքների առկայությունը ճշտելու, պարտավոր է օգնել»,- նշեց Մելիք-Նուբարյանը։
Օգնելուց հետո, երբ արդեն քաղաքացին առողջացած կլինի, բուժհաստատությունը ստիպված է լինելու պահանջել բուժման համար նախատեսված գումար, որը, ըստ առողջապահության նախարարության մասնագետների հաշվարկի` կարող է կազմել 800.000 դրամ և ավելի, մինչդեռ Հայաստանի բնակչության կեսից ավելին ի վիճակի չէ նման աստղաբաշխական ծախսեր թույլ տալ։
«Մեր բնակչության 75 տոկոսը չի կարող իրեն թույլ տալ չնախատեսված ծախս 45.000 դրամի չափով, հիմա ինչպես պետք է այդ մարդը վճարի 800.000 դրամ, այսինքն` այդ մարդը չի դիմելու բժշկի, մնալու է տանը, շարունակելու է վարակը տարածել»,- եզրափակեց փորձագետը։
Նշենք, որ ԱՆ մամուլի խոսնակ Հռիփսիմե Խաչատրյանը Sputnik Արմենիայի հետ զրույցում նշել էր, որ ՀՀ առողջապահության նախարարությունը քննարկում է չպատվաստված և կորոնավիրուսով վարակված քաղաքացիների հիվանդանոցային բուժումը փետրվարի 1-ից վճարովի դարձնելու հարցը։
Չպատվաստված քաղաքացիների բուժումը վճարովի դարձնելու մասին քննարկումները սկսվել են հոկտեմբերից։ Դեռ այն ժամանակ նշվում էր, որ կորոնավիրուսով հոսպիտալացված քաղաքացիները ստիպված կլինեն վճարել մոտ 800.000 դրամ։
Հիշեցնենք, որ այս պահին բուժումն իրականացվում է պետական միջոցներով։