ԵՐԵՎԱՆ, 12 դեկտեմբերի – Sputnik. Արևմուտքի երկրները 1990-ականներին մտածում էին, որ Ռուսաստանը կփլուզվի, և դա ընդամենը ժամանակի հարց է։
Այս մասին ՌԴ նախագահ Վլադիմիր Պուտինը պատմել է «Ռուսաստան. նորագույն պատմություն» ֆիլմում, հայտնում է ՌԻԱ Նովոստին։
ՌԴ նախագահը նաև հայտնել է, որ տեսել է քարտեզները, որտեղ Ռուսաստանը պատկերել են այնպես, իբրև թե այն մի քանի ինքնուրույն պետության է բաժանված։
«Այո, ես նման քարտեզներ եմ տեսել, բայց հարցն անգամ քարտեզների մեջ չէ։ Արևելաեվրոպական երկրներից մեկի նախագահը, հիմա անուն չեմ հնչեցնի, որովհետև այդ մարդն ինձ իրավունք չի տվել հրապարակավ խոսել դրա մասին, ինձ հետ հանդիպումներից մեկի ժամանակ ուղղակի ասաց, որ Եվրոպայում հարց չի եղել` կփլուզվի Ռուսաստանը, թե ոչ, իրենք կարծում էին, որ դա անխուսափելի է։ Միակ հարցն այն էր, թե երբ դա տեղի կունենա»,- ասել է Պուտինը։
Պուտինը հավելել է, որ հավանաբար, նման տրամադրությունների հիմքեր այն ժամանակ եղել են։