ԵՐԵՎԱՆ, 8 դեկտեմբերի – Sputnik. 2023-ից ներդրվելու է անապահովության գնահատման նոր համակարգ։ Կառավարության հետ հարցուպատասխանի ժամանակ հայտարարեց ՀՀ աշխատանքի և սոցիալական հարցերի նախարար Նարեկ Մկրտչյանը։
«Արդեն իսկ ստեղծվել է միջգերատեսչական խորհուրդ, աշխատանքները սկսվել են։ Պետք է քաղաքացիներին ոչ թե սոցիալական աջակցություն տանք, այլ կարիքի գնահատման հիման վրա ծառայություններ մատուցենք, որն էլ կմեղմի աղքատությունը»,–ասաց նախարարը։
Մկրտչյանը նշեց, որ հաճախ հարց է հնչում, թե ինչու միանգամից չեն բարձրանում նպաստները, այլ տարեցտարի են ինչ–ինչ վերանայումներ լինում։ Ըստ նախարարի` նպաստների բարձրացումը պետք է բխի երկրի սոցիալական վիճակից, քանի որ մեկը մյուսի հետ փոխկապակցված է։ Նրա խոսքով` քայլեր են իրականացվելու, որպեսզի ծայրահեղ աղքատությունը վերացվի։
Հիշեցնենք` 2022 թ.–ի հունվարի 1-ից կենսաթոշակներն ու նպաստներն ավելանալու են։ Նվազագույն կենսաթոշակի չափը լինելու է 28 600 դրամ՝ այժմ սահմանված 26 500 դրամի փոխարեն: Բարձրանալու են նաև պարտադիր ժամկետային զինվորական ծառայության շարքային կազմի զինծառայողների հաշմանդամության զինվորական կենսաթոշակի չափերը։