ԵՐԵՎԱՆ, 7 դեկտեմբերի – Sputnik. ԱԺ «Քաղաքացիական պայմանագիր» խմբակցության պատգամավորները «Հայաստան» խմբակցության պատգամավորների օգնականներին հրավիրել են ԱԺ փոխնախագահ Ռուբեն Ռուբինյանի սենյակ` սուրճ խմելու, ինչից հետո մոտ 20 հոգով ներխուժել են ու սկսել հարվածել։ Լրագրողների հետ զրույցում ասաց «Հայաստան» խմբակցության պատգամավոր Արամ Վարդևանյանը` անդրադառնալով այսօր ԱԺ–ում տեղի ունեցած ծեծկռտուքին։
««Հայաստան» խմբակցության պատգամավորների օգնականները, փորձագետները ժամը 14։30-ի սահմանում որոշակի բանավեճ են ունեցել «Քաղաքացիական պայմանագիր» խմբակցության երկու պատգամավորի հետ, որը կարծես թե հարթվել է միմյանց ձեռք են սեղմել և անցել առաջ։ Որևէ վեճ այդտեղ չի եղել», - պատմեց Վարդևանյանը՝ ավելացնելով, որ այդ պատգամավորները եղել են Հրաչյա Հակոբյանը և Սիսակ Գաբրիելյանը։
Դրանից կարճ ժամանակ անց, պատգամավորի խոսքով, իրենց գործընկեր Սևակին հրավիրել են սուրճ խմելու։
«Տեղեկությունը նախնական է, և հրավիրողը կարծես թե Ռուբինյանի աշխատակազմից է եղել։ Գերասիմին ևս հրավիրել են` ասելով, թե արի, սուրճ ենք ուզում հյուրասիրել։ Տղաներին միացել է նաև Տարոնը։ Սուրճ չի եղել, բնականաբար, որովհետև խոսքը նախապես պլանավորած գործողության մասին է։ Երեքին հրավիրելուց հետո ներխուժել են մոտ 20 հոգի, դրանց մեջ մի շարք պատգամավորներ, և սկսել են հարվածել տղաներին», -ասաց Վարդևանյանը։
Նա պատգամավորների անուններ չնշեց, բայց ասաց, թե նրանք նույն այն անձինք, որոնք մի քանի ամիս առաջ ԱԺ նիստերի դահլիճում խուլիգանություն էին դրսևորել։
Վարդևանյանի խոսքով` տղաները մարմնական վնասվածքներ ունեն։
Հիշեցնենք` այսօր աշխատանքային օրվա ավարտին Ազգային ժողովում ծեծկռտուք էր տեղի ունեցել։ Ինչպես լրագրողներին պատմել էր ԱԺ փոխնախագահ, «Հայաստան» խմբակցության անդամ Իշխան Սաղաթելյանի օգնական Սյունե Գևորգյանը, ծեծկռտուքը տեղի է ունեցել ԱԺ փոխնախագահ Ռուբեն Ռուբինյանի աշխատասենյակում։ Դրան մասնակցել են ՔՊ–ականներ Հրաչյա Հակոբյանը, Վահագն Ալեքսանյանը, Սիսակ Գաբրիելյանը։
Ավելի ուշ պատգամավոր Հրաչյա Հակոբյանը լրագրողների հետ զրույցում վստահեցրել էր, որ ինքը չի մասնակցել կռվին, երբ հասել է, ծեծկռտուքն արդեն սկսված է եղել։
Վահագն Ալեքսանյանը նույնպես պնդել էր, որ կապ չունի ծեծկռտուքի հետ։Վերջին պահին է հասել։
ԱԺ նախագահ Ալեն Սիմոնյանն էլ լրագրողներին ասել էր, որ կռվից տեղյակ չէ, եկել է Ռուբեն Ռուբինյանի սենյակ՝ իմանալու դեպքի մանրամասները։