ԵՐԵՎԱՆ, 3 դեկտեմբերի – Sputnik. ՀՀ 2022 թվականի պետական բյուջեով գիտության ֆինանսավորումը 2021-ի նկատմամբ կաճի շուրջ 85 տոկոսով, իսկ գիտական թեմատիկ հետազոտություններին հատկացվող գումարները կավելանան 2,5 անգամ՝ կազմելով 6,7 մլրդ դրամ: Տեղեկությունը Facebook-ի իր էջում հայտնել է ՀՀ վարչապետ Նիկոլ Փաշինյանը։
Նրա խոսքով`կառավարությունն արդեն ընդունել է ծրագիր մինչև 2026 թվականը գիտության ոլորտի աշխատողների բազային աշխատավարձի աճի վերաբերյալ։
«Ըստ էության, այժմ գիտաշխատողների աշխատավարձը կազմում է մոտ 90000 դրամ։ Մեր որոշմամբ` մինչև 2026 թվականը կլինի 276.000 դրամ, որը կաճի 206 տոկոսով, իսկ գիտական ստորաբաժանումների ղեկավարների աշխատավարձերը, որոնք այսօր կազմում են 141.000 դրամ, մինչև 2026 թվականը կլինեն 477.000 դրամ (կաճեն 238 տոկոսով)»,–ասաց Փաշինյանը։
Նա ընդգծեց, որ պետության այս քաղաքականությունը լինելու է շարունակական, բայց այսօրվա քննարկման հիմնական նպատակն այդ ֆինանսների ճիշտ տեղաբաշխումն է, որ ոչ թե միայն աշխատավարձերի մասին «վերնագիր» լինի, այլ կարողանան ակնկալել միջնաժամկետ հատվածում կոնկրետ արդյունքներ, և ոլորտը տվյալ ֆինանսավորման ազդեցությունը տեսնի։
Հիշեցնենք` այս տարվա ապրիլի 8–ի նիստում ՀՀ կառավարությունը որոշեց գիտական և գիտատեխնիկական գործունեության ծրագրերին 2021թ–ի բյուջեով հատկացված ֆինանսական միջոցներն ավելացնել 2 784 565 400 դրամով։
Նախագիծը ներկայացնելիս ԿԳՄՍ փոխնախարար Ժաննա Անդրեասյանը հայտնել էր, որ ավելացվող միջոցներն ուղղվելու են 2 հիմնական ոլորտների` թեմատիկ գիտական հետազոտություններին և ենթակառուցվածքի արդիականացման ծրագրերին (լաբորատորիաներ, ժամանակակից սարքավորումներ և այլն)։