Ռուսական խաղաղապահ զորախմբի զինծառայողներն ապահովել են Ամարաս վանական համալիր այցելած շուրջ 150 ուխտավորի անվտանգությունը։ Տեղեկությունը հայտնում է Ռուսաստանի պաշտպանության նախարարությունը։
«Մեր ուժը մեր հավատքի մեջ է, տաճարում։ Ցավոք, մենք չենք կարող այցելել Շուշիի Ղազանչեցոց եկեղեցի, բայց կարողանում ենք անվտանգ այցելել այս տաճար և աղոթել մեր Աստծուն: Եվ դրա համար մենք շատ շնորհակալ ենք առաջին հերթին խաղաղապահներին, ձեր ժողովրդին՝ Վլադիմիր Վլադիմիրի Պուտինի գլխավորությամբ», - ասել է ուխտավորներից մեկը` Մարիամ Մարգարյանը։
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին:
44-օրյա պատերազմի ավարտից ու հրադադարի մասին համաձայնագրի ստորագրումից հետո Ամարասի վաղ միջնադարյան վանքը հայտնվեց կողմերի սահմանազատման գծի մոտ: Արցախում ռուսական խաղաղապահ զորախմբի զինծառայողները պարբերաբար ապահովում են այդ սրբավայր այցելող ուխտավորների անվտանգությունը։