ԵՐԵՎԱՆ, 30 նոյեմբերի – Sputnik. ՀՀ պաշտպանության փոխնախարար Արման Սարգսյանն այսօր ԱԺ–ում անպատասխան թողեց Իշխանասարից ադրբեջանցիների հետ քաշվելու մասին լրագրողների հարցերը։
«Այս անգամ «ճողոպրեմ»` ձեր նախորդ անգամվա գրածի համաձայն, մյուս անգամ կպատասխանեմ»,– ասաց փոխնախարարը` ակնարկելով մամուլում իր հասցեին արված արտահայտությունը։
Այսպիսով, Արման Սարգսյանը, ըստ էության, ոչ՛ հերքեց, ո՛չ էլ հաստատեց լուրերն այն մասին, թե ադրբեջանական ԶՈւ–ն Սյունիքի Իշխանասարի տարածքում հետ է քաշվել դեպի նախկինում զբաղեցրած դիրքեր։
Այսօր առավոտյան Իշխանասարի գյուղապետ Մարատ Պետրոսյանը Sputnik Արմենիային հայտնել էր, որ Ադրբեջանի զինված ուժերը հեռացել են Իշխանասար լեռան այն հատվածից, որտեղով նրանք ճանապարհ էին կառուցել։
Թե որքան են ադրբեջանցիները հեռացել, Պետրոսյանը չգիտեր։ Նրան հայտնի չէր նաև՝ արդյոք այդ դիրքերում հայ զինծառայողներ տեղակայվել են, թե ոչ։
Գյուղի բնակիչներն էլ Sputnik Արմենիային տեղեկացրել էին, որ ադրբեջանցիների հեռանալու մասին իրենց հայտնի է դարձել երեկ։
Հիշեցնենք` նոյեմբերի 16–ին` ժամը 13։00-ի սահմանում, ադրբեջանական ԶՈւ ստորաբաժանումները հերթական սադրանքն էին նախաձեռնել ՀՀ արևելյան սահմանագոտու ուղղությամբ՝ գնդակոծության ենթարկելով հայկական դիրքերը։
Արդյունքում հայկական կողմը 2 մարտական դիրք կորցրեց, ՀՀ պաշտպանական գերատեսչությունը հայտնեց 12 հայ զինծառայողի գերեվարման և մեկ զոհի մասին:
Նոյեմբերի 16–ին` ժ. 22։30–ի սահմանում, ռուսական կողմի միջնորդությամբ կրակը դադարեցվեց։