ԵՐԵՎԱՆ, 29 նոյեմբերի – Sputnik. Դոնի Ռոստովի թիվ 22 դպրոցի բակում տեղի կունենա Խորհրդային Միության կրկնակի հերոս, Խորհրդային Միության մարշալ Հովհաննես Բաղրամյանի հուշարձանի բացումը: Տեղեկությունը հայտնում են ՌԴ Հարավային ռազմական օկրուգի մամուլի ծառայությունից։
Հանդիսավոր միջոցառումը տեղի կունենա դեկտեմբերի 2-ին՝ մարշալ Բաղրամյանի ծննդյան օրը։ Բացման արարողությանը կմասնակցեն Հարավային ռազմական օկրուգի զինծառայողները, պատվո պահակախմբի վաշտը, վարչակազմի և հասարակական կազմակերպությունների ներկայացուցիչներ:
Խորհրդային զորահրամանատար Հովհաննես Բաղրամյանը ծնվել է 1897 թվականին։ Հայրենական մեծ պատերազմի ժամանակ նա ղեկավարել է առաջին Մերձբալթյան և Երրորդ Բելառուսական ճակատները։ Լենինի 7 շքանշանի ասպետ է, նաև ԽՍՀՄ կրկնակի հերոս, Խորհրդային միության մարշալ:
Պատերազմից հետո, արդեն Կարիբյան ճգնաժամի ժամանակ, Բաղրամյանը ղեկավարել է Կուբայում խորհրդային զորքերի խմբի տեղափոխման և տեղակայման ծրագրի մշակումը, ինչպես նաև Խորհրդային Միության գործողությունները։
Մահացել է 1982 թվականի սեպտեմբերի 21-ին։ Զորավարի աճյունասափորը թաղված է Մոսկվայի Կարմիր հրապարակում գտնվող Կրեմլի պատի մեջ։