Ավանեսյանը հայտնեց` երբ և ովքեր կարող են վերապատվաստվել

Առողջապահության նախարարը հայտնեց, որ Հայաստանում դեռևս պարտադիր բնույթ չի կրում կորոնավիրուսի դեմ պատվաստման խթանիչի կիրառումը։
Sputnik
ԵՐԵՎԱՆ, 29 նոյեմբերի – Sputnik. ՀՀ քաղաքացին կորոնավիրուսի դեմ պատվաստման 2-րդ դեղաչափը ստանալուց 6 ամիս հետո կարող է խթանիչ դեղաչափը` «բուսթերը» ստանալ։ Այսօր հրավիրված մամուլի ասուլիսի ժամանակ այս մասին ասաց ՀՀ առողջապահության նախարար Անահիտ Ավանեսյանը, անդրադառնալով վերապատվաստումներին։

«Արդեն իսկ սահմանվել են աղյուսակները, թե որ պատվաստման դեպքում որ խթանիչն է նախընտրելի կիրառել։ Այն քաղաքացիներին, որոնք պատվաստվել են ոչ ՌՆԹ հիմքով պատվաստանյութերով` («Մոդեռնա» և «Պֆայզեր»), խորհուրդ է տրվում նույն պատվաստանյութի խթանիչ կիրառել»,–ասաց նախարարը` հավելելով, որ կան քաղաքացիներ, որոնք երրորդ դեղաչափն արդեն իսկ ստացել են։

Նրա խոսքով` կարևոր է, որ առաջին հերթին խթանիչ ստանան ռիսկի խմբում գտնվող քաղաքացիները` խրոնիկ հիվանդություններ ունեցողները, բուժաշխատողները։ Ավանեսյանը նշեց, որ դեռևս պարտադիր բնույթ չի կրում խթանիչի կիրառումը։
Ինչ վերաբերում է սահմանափակումներին` Ավանեսյանը հավելեց, որ դիմակային ռեժիմը դեռ կպահպանվի, քանի որ բոլոր հետազոտությունները վկայում են, որ դիմակներ կրելն արդյունավետ է։
Հայաստանում վերապատվաստվել կարելի է 6 ամիս անց` կամավորության սկզբունքով. նախարար
Ավելին` նրա խոսքով` առաջիկայում կկասեցվի այն լաբորատորիաների աշխատանքը, որոնք չեն բավարարի համապատասխան պայմաններին։ Հարցն այն է, որ նախարարության մասնագիտական խումբը լաբորատորիաներում մշտադիտարկումներ է իրականացնում, որոնք առաջիկա 10 օրերին կամփոփվեն. լաբորատորիաների համար հատուկ ցուցումներ կգործեն։
Հայտնի է՝ քանի պատվաստում է կատարվել Հայաստանում
Հիշեցնենք, մինչ այս կառավարության նիստում Ավանեսյանն ասել էր, որ վերապատվաստումների իրականացման կարգի ու ժամկետների վերաբերյալ պաշտոնական դիրքորոշում չկա, այդ հարցը դեռ քննարկվում է։