Երևանի տրանսպորտային նոր ցանցը թղթի վրա է։ Այն կյանքի կոչելու համար քաղաքապետարանը մասնագետներ չունի, հետևաբար, այդ ծրագրի շահագործումը շարունակ հետաձգվում է և դեռ պարզ չէ` կհասնե՞ն վերջնակետին, թե՞ ոչ։ Sputnik Արմենիայի հետ զրույցի ընթացքում այս մասին ասաց փոխադրողների միության նախագահ Հրանտ Եղիազարյանը։
«Քաղաքապետարանում հստակ չեն պատկերացնում խնդիրները, մինչդեռ նոր ցանցը շահագործելու համար պետք է ավտոբուսների պարկը համալրել հստակ թվաքանակով։ Մեզ անհրաժեշտ է 940 ավտոբուս, որոնցից 8–10–ն ամեն օր պետք է աշխատեն երթուղիներում։ Ներկրված 211 ավտոբուսներն ընդամենը որոշ չափով կթեթևացնեն իրավիճակը, բայց ամբողջապես հարց չեն լուծի»,– նշեց փոխադրողների միության նախագահը։
Ըստ նրա` մեծ տարողությամբ մեքենաների համար երթուղային ցանցում նախատեսված են որոշակի առանձնահատկություններ, և դրանց շահագործմամբ քաղաքը զգալիորեն կբեռնաթափվի, այլ ոչ թե դժվարություններ կառաջանան երթևեկության մեջ։
Բացի դրանից, նոր ցանցի կիրառման դեպքում միկրոավտոբուսների քանակը կդառնա զրո, նրանք դուրս կգան շրջանառությունից։
«Գծատերերից շատերն իմ ընկերներն են, բայց պետք է ճշմարտությունն ասեմ։ Եթե մենք դիտարկենք ոչ թե քաղաքի, մեր երևանցիների շահը, այլ խնդրին մոտենանք գծատերերի շահի տեսանկյունից, ուրեմն միշտ կլինենք պատռված կրկնակոշիկի վիճակում։ Այդպես մտածել չի կարելի, առավել ևս, որ միկրոավտոբուսների շահագործման պայմանագրային ժամկետը վաղուց լրացել է»,–ասաց փոխադրողների միության նախագահը։
Անդրադառնալով նոր ցանցի ներդրման պարագայում ուղավարձի անխուսափելի թանկացման հանգամանքին, Եղիազարյանն ընդգծեց, որ 1996 թվականից ի վեր ուղեվարձը մնացել է նույնը, ինչի մեղավորը քաղաքապետարանն է և օրենսդրական այն փաթեթը, որով կարգավորվում է տրանսպորտի ոլորտը։
«Մենք ուզում ենք մարդավայել սպասարկու՞մ, թե՞ ուզում ենք, որ մարդիկ հոգնած գնան աշխատանքի և այնտեղից ջարդված գնան տուն։ Չարժե ամեն ինչ կապել մարդկանց ֆինանսական վատ վիճակի հետ։ Ամեն ինչի համար գումար կա, բայց փոխադրումների համար չկա՞։ Եթե այպես մոտենանք հարցին, այս վիճակից երբեք դուրս չենք գա»,– նշեց փոխադրողների միության նախագահը։
Եղիազարյանի պնդմամբ`անհրաժեշտ է պահպանել արտոնությունների մեխանիզմը հասարակության տարբեր խավերի համար, իսկ դրանք, ըստ նրա, 7-8–ն են, որոնց պարագայում պետք է սահմանվեն ցածր տարիֆներ։
Նշենք, որ Երևանի քաղաքային բյուջեի միջոցներով ձեռք է բերվել 211 հատ 8,6 մետրանոց ավտոբուս։
Երևանի քաղաքապետ Հայկ Մարությանը հայտնել է, որ արդեն մի քանի օրից մայրաքաղաքի փողոցներում կտեսնենք նոր քաղաքային ավտոբուսները, որոնք մի քանի փուլերով կմտնեն երթուղի։