Առաջին հայացքից թվում է, որ կենսաթոշակների անկանխիկ վճարման շնորհիվ ծառայություններից օգտվելն ավելի արդյունավետ է ու մատչելի, սակայն մարզերում կան բազմաթիվ բնակավայրեր, որտեղ քարտերի սպասարկման բանկոմատների առումով սահմանափակ հնարավորություններ կան, Sputnik Արմենիայի հետ զրույցում նման տեսակետ հայտնեց աշխատանքի և սոցիալական հարցերի նախկին նախարար Մեսրոպ Առաքելյանը։
«Կան քաղաքներ, որտեղ ներկայացված են սահմանափակ թվով բանկեր, մինչդեռ քաղաքացիները կարող են նախընտրել այլ բանկերով սպասարկումը, հետևաբար պետությունը որևէ քայլ քաղաքացուն պետք է պարտադրի միայն այն դեպքում, եթե դրա համար համապատասխան հնարավորություններ է ընձեռում։
Մենք գործ ունենք կենսաթոշակառուների հետ, որոնց պարտադրել օգտվելու բանկային անկանխիկ ծառայություններից և դա դարձնել անկանխիկ գործառնությունների զարգացման կարևորագույն թիրախ, այնքան էլ արդյունավետ չէ, քանզի նույնիսկ կենսաթոշակի չափից սկսած փաստվում է այն հանգամանքը, որ կենսաթոշակառուներն իրենց թոշակը մեծամասամբ օգտագործում են անմիջապես»,– ասաց Առաքելյանը։
Նրա դիտարկմամբ` մեծահասակները բանկային քարտով աստիճանաբար գնումներ կատարելու հնարավորություն չունեն` հաշվի առնելով կենսաթոշակի ցածր չափը, հետևաբար գումարը ծախսում են հիմնականում կոմունալ վճարումներ կատարելու և դեղորայք ձեռք բերելու համար։
«Անկանխիկ գործառնությունների զարգացմանը խոչընդոտում է նաև այն հանգամանքը, որ առևտրային կետերում քարտով առևտրի դեպքում տնտեսվարող սուբյեկտները ստիպված են լինում բանկերին 1-3 տոկոս միջնորդավճար վճարել, ինչը հատկապես փոքր խանութների պարագայում մեծ ծախս է համարվում, ուստի փոքր բիզնեսը հիմնականում խուսափում է քարտերի սպասարկումից»,– ասաց Sputnik Արմենիայի զրուցակիցը։
Առաքելյանի կարծիքով` պետությունն այստեղ առաջին հերթին բանկերի միջոցով որոշակի մոտիվացիոն համակարգ պետք է ներդնի, այլ ոչ թե անկանխիկ գործարքների պարտադրանքին զուգահեռ տնտեսվարողների համար լրացուցիչ ծախսեր առաջացնի։
Նշենք, որ «Պետական կենսաթոշակների մասին» օրենքի համաձայն` 2022 թ.-ի հունվարի 1-ից կենսաթոշակները կվճարվեն բացառապես անկանխիկ եղանակով՝ բանկի միջոցով։
Բացառություն կկազմեն առաջին կամ երկրորդ խմբի հաշմանդամություն ունեցող, 75 տարին լրացած կամ 14 տարին լրացած անչափահաս անձինք, ովքեր իրենց ընտրությամբ կենսաթոշակը կարող են ստանալ նաև կանխիկ եղանակով՝ «Հայփոստի» միջոցով:
Բացառապես անկանխիկ եղանակով կենսաթոշակների վճարման համակարգին անցումը կիրականացվի փուլերով։